Latest News

Mizoram-ah hri kai hmuhchhuah la awm belh zel

Mizoram-ah COVID-19 hri kai hmuhchhuah thar ala tlahniam hlei thei lova, niminpiah khan Sample 3500 enfiah niin hri kai mi 311 zet hmuh leh an ni a, Mizoram-a hri kai hmuhchhuah chu 23,014 an tling tawh a ni.

Niminpiah khan ZMC Laboratory-ah Sample 876 enfiah leh niin heng atang hian hri kai 61 hmuh leh an ni a, an vai hian Aizawl District-a Sample lak vek an ni a, Armed Veng South-ah hri kai mi 14 hmuh niin Veng khat-a hri kai hmuhchhuah an tamna ber a ni a, hri kai tawh nen inkawmhnaihna neih avanga inkhunghrang lai an ni tlangpui a, Frontline Worker mi 2 bakah State pawn atanga rawn lut mi 6 bakah hri kaina hriatloh pakhat a awm bawk.

Mizoram District hrang hranga TrueNat Laboratory 7-ah sample 223 enfiah niin hri kai mi 22 hmuh an ni bawk a, an zinga mi 15 te chu Lunglei District-a hmuhchhuah niin mi 10 te chu Company hnuaia thawk leh inkhunghrang lai an ni a. Serchhip District-ah State pawn atanga rawn lut hri kai mi 5 hmuh niin Lawngtlai District-ah hri kai mi pahnih hmuh an ni bawk.

Rapid Antigen Test hmangin niminpiah khan Sample 2410 enfiah ni bawkin hri kai mi 228 hmuhchhuah an ni a, an zinga 140 te chu Aizawl District ami an ni, Aizawl District-a hri kai hmuhchhuah zingah hian Central Jail-a tanglai mi 18 an tel a, Chhinga Veng-ah mi 15 Ramhlun South-ah 12 leh Ramthar Veng-ah mi 11 hmuh an ni bawk. Lunglei District-ah hri kai mi 30 hmuh niin an zinga 24 te chu Lunglei khawpui chhung ami te an ni a, Mamit District-ah hri kai mi 23 hmuh niin Dapchhuah khua ah mi 12 zet hmuh an ni. Kolasib District-ah hri kai mi 19 hmuh an awm a, Serchhip District-ah mi 8 leh Lawngtlai District-ah hri kai mi 4 hmuh an ni a, Siaha District-ah hri kai 2 hmuh niin Champhai leh Saitual District-ah hri kai pakhat ve ve hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 23,014 niin nimin lamah thawktu lama harsatna thleng avangin nimin-a enkawl dam awm zat tihchhuah a ni lova. Nimin zing thleng khan Mizoram-ah hri kai 19,007 te chu enkawl dam ni tawhin hri kai enkawllai 3906 an awm bawk a ni.

Hri kai zingah mi pahnih an boral leh :

Mizoram-a COVID-19 hrikai zingah nimin khan mi pahnih boral lehin hri kai zingah mi 103 an boral ta a, tun thla chhungin hri kai mi 10 lai an boral tawh bawk a ni. Sawrkar thuchhuah in a tarlan danin nimin tlai dar 4:00 khan Ngunhuma (57), M. Kawnpui (Lawngtlai District) chu ZMC-ah COVID-19 vangin a boral a, hemi hnu nizan dar 7:40 khan Elizabeth Zonunmawii (31), Mamit Lungsir Veng chu ZMC-ah hian a boral ve leh bawk a ni.

Comments

Chhiar Hlawhte