Lungrem chim chhui zo tawh

Kumin June 11, 2021 (Zirtawpni) zan dar 9:30 vel a mi 4 in nunna an chan phahna, Aizawl Thuampui Veng-a lungrem chim dan chu a chhui tura ruat Aizawl DC chuan chhui zo tawhin a report sawrkarah a thehlut tawh.

Aizawl DC Dr. Lalhriatzuala Ralte sawi danin, lungrem chin dan chungchang an chhuina report leh rawtna an neih te chu Mizoram sawrkar-a Disaster Management & Rahabilitation (DM&R) Department-ah an thehlut tawh a, chhiattawk chhungkuate hnenah Ex gratia pawh pek fel a ni tawh.

Aizawl DC chuan an chhuina report leh thurawn an neihte chu DM&R lamin an la thlir leh dawn niin a sawi a, hemi chungchangah hian DM&R Secretary Lalbiaksangi chuan Aizawl DC hnen atangin an chhuina report an dawn tawh thu leh Department in thlirho tura ruahmanna an siam mek laiin, COVID-19 hripui vangin thawktu lamah harsatna a awm tih a sawi a, remchang hmasa ber a thlirho turin hmachhawp ah a awm mek niin a sawi. 

Tarlan tawh angin, June 11 zan khan Thuampui Veng-ah lungrem chimin a thlanga In pakhat a hnawl a, a chung zawka cheng H. Lalbiak-zuala te chhungkua, member 7 zinga mi 6 te chu a hnawl tel a ni. Chhungkaw pa ber Lalbiakzuala chu In chim atangin a vakchhuak a, a fanu Zairi-mawii chu lei chim hian a kawng chin hnuailam delhin mi tlawmngaiten an lachhuak a, midang Zairimawii fate pahnih - Joseph Lalrinhlua (5) leh Daniel Lalngaihsaka (3) te bakah Lathlamuani (16) leh Laltanpuii (16) te chu thi-a hmuh an ni.

June 25, 2021 khan State Disaster Response Fund (SDRF) hnuaiah zangnadawmna (Ex-Gratia) Rs 4,00,000 /- theuh hlan an lo ni tawh a, zangnadawmna sum te hi Lalthlamuani leh Laltanpuii te hmingin an pa, Lalbiakzuala hnenah hlan a ni a, Joseph Lalrinhlua leh Daniel Lalngaih-saka te hmingin, an nu Zairimawii hnenah hlan a ni.