ZMC-a harsatna tawh chungchang leh thawktu indaihlohna chungchang sawiho a ni

Nimin khan Health Minister Dr. R. Lalthangliana hovin Dedicated COVID Hospital (DCH), Zoram Medical College harsatna tawh chungchang leh damlote enkawltu Volunteers Frontline Workers indaih-lohna chungchang sawiho a ni.

SAD Conference Hall-a he sawihona hunah hian Zoram Medical College Director, Dr. John Zohmingthanga chuan an dinhmun tarlangin, June thla khan ZMC-ah naupiang 35 an awm thu leh an zinga 15 chu enkawl uluk zui ngai (neo-natal care) mamawh an nih thu sawiin, tun thla kal mek July-ah nimin thlengin naupiang 50 an awm thu leh an zinga 30 chu enkawl uluk zui ngai (neo-natal care) mamawh an nih thu a sawi a. COVID-19 Third Wave lo thleng tur atana inbuatsaihna, naupangte enkawlna tur bik HDC/NICU/SICU pawh buatsaihna theihtawpchhuaha an kalpui thu sawiin, LG Company in an pek Air Conditioner pawh an bun thu a sawi a, TATA Trust atangin Oxygen Pipline siamna tur leh thil pawimawh dang tihna tur sum an hmu dawn tih a sawi bawk.

COVID-19 Second Wave-a ZMC-a damlo enkawl ngai an pun nasat avanga thawktu, a bikin volunteer Nurse an lak belhte zinga mi 45 lai mai chu an exam a hnaih tawh avangin an chawlh a ngai tawh dawn tih sawiin ZMC Director chuan, heti a nih mek lai hian naupangte enkawlna tur ward peihfel a nih chuan thawktu tur Nurse lak a ngaih belh dawn tih a sawi a, Nurse mai bakah thawktu dang Medical Attendant chi hrang hrang indaihlohna a nasa tih a sawi bawk.

ZMC-a COVID-19 hri kai damlote enkawlna khum (ICU telin) awm mekah tun dinhmunah damlo 310 an awm he hunah hian tarlan niin, an zinga enkawl ngai zualte awmpuitu mi 82 awmin nausen pianghlim 12 an awm bawk a, an vai hian mi 404 an ni a. Hetih rual hian ZMC khum indaihlohna phuhru tura ruahman, damlo serious vak lo enkawl uluk la ngaite dahna tur ruahman MRD DCHC, MINECO, khum 50 awmna pawh luah khah vek a ni bawk.

District tina Dedicated COVID Health Centre (DCHC) leh Aizawl-a DCHC thar 2 ruahman Kulikawn Hospital leh Mualpui-a Sports Council building ah thawktu mi chi hrang hrang a tlem berah mi 220 vel mamawh belh a ni dawn tih he Meeting-ah hian sawi a ni a, Specialist Doctor, MBBS, Staff Nurse, Lab. Technician leh thawktu dang engemawzat mamawh belh an ni a. ZMC-a volunteer Nurse chawl ta te thlaktu tur pawh a rang thei ang bera tihfel a tul thu sawi a ni bawk a. Heng mamawhna te hi a tul anga sawrkara thuneitute hnenah thlen a, tihhlawhtlin thuai a pawimawh thu sawi a ni bawk.