Chanchin thar thenkhat :

Remna zawng thuai turin hrilh

Union Home Minister Amit Shah chuan Mi-zoram leh Assam ramri buai chungchangah State pahnih Chief Minister te chu remna zawng thuai turin a hrilh. Union Home Minister hian State pahnih Chief Minister ve ve te hi niminpiah a buaina thleng chung changah biain, inrem dan kawng zawng turin a ti a ni. Hetihlai hian Union Law and Justice Minister Kiren Rijiju pawhin hmarchhak MP-te inzawmkhawmna, North East MP Forum te chuan Mizoram leh Assam ramri-ah remna leh muanna awmtir turin mipuite an ngen tih a sawi bawk.

Lunglei District in dawng leh

Lunglei District Bawrhsap in India ram hmun hrang hrang-a NGO Foundation/Company/Corporation te atanga CSR kaltlangin mipuite tana hlawkpui leh tangkai pui theih tur Medical lam kaihhnawih bungraw hrang hrang a dapna kal zelah Paytm Foundation atangin Oxygen Concentrator 20, cheng nuai 15 man hu te; ACT Grants, New Delhi atangin Oxygen Cylinder 15, cheng nuai 2.5 hu leh World Vision, India, Chennai atangin PPE Kits, N-95 Mask, Surgical Mask, Oximeter, Face Shield etc. cheng nuai 10 hu te chu dawn leh niin heti hian Lunglei District in hri leng kaihhnawiha CSR kaltlang tanpuina a dawn chu cheng nuai 142 hu a tling tawh a ni.

Thubuai chinfel vat duh

Saichal khaw VC leh NGO hrang hrang- YMA, MUP, MHIP leh Students’ Union te chuan thuchhuah intawm siamin kum 2014-a Govt. Saichal Primary School Zirtirtu atana khawtlang in an rawih H. Lalhmingmawia, a zirlai naupang hmeichhia 20 chuang zet a khuaikhem leh mawilo taka mipat hmeichhiatna lam hawi-a a lo chet avanga Champhai District Court-a thubuai nei mek chu tun thleng hian a thubuai chinfel ala ni lo tih an tarlang a. He thubuai hi a rang thei ang bera chingfelin, he a pawi khawihna ah hian a phu tawk hremna hmu ngei se an duh thu an thuchhuah ah hian an tarlang bawk.

Committee din thar siamtha

Mizoram sawrkar-a Home Secretary chuan thuchhuah siamin tunhnaia sawrkar in Boundary Committee a din chu Member in ruat belin siamthat a ni tih a tarlang a. Boundary Committee-ah hian Deputy Chief Minister chu Chairman niin Vice Chairman-ah Home Minister leh Member Secretary-ah Home Secretary te an ni a. Heng bakah hian Member atan Minister 3, Chief Secretary leh Addl. Chief Secretary, DGP/IGP (Hqrs.), Political party 6 aiawh te, NGO Coordination Committee-a tel pawl 5 te aiawh leh ruat bik mi thenkhat te an tel bawk a ni.