NABARD kum 40 tlin lawmna Minister hovin nei

National Bank for Agriculture and Rural Development (NABARD) chuan nimin khan an kum 40 tlin lawmna neiin Cooperation leh Agriculture Department changtu Minister, C.Lalrinsanga chuan khuallian niin a hmanpui a ni.

NABARD Office, Aizawl-a an kum 40 tlin lawmna ah hian Agriculture Minister chuan NABARD in kum 40 an tling ta chu a lawmpui thu sawiin, NABARD hian Mizoram tan thil nasa tak min thawhsak tawh a, min thawhsak mek zel tih a sawi a. Farmer Producer Organizations (FPO) din kawngah te, Mizoram Cooperative Apex Bank (MCAB) kaltlanga Primary Agricultural Credit Societies (PACS) din chungchangah te, Alternative Investment Funds (AIFs) chungchang thlengin kawng hrang hrangah hmasawnna rahbi thar Mizoram in a kai theihna turin hna an thawk tih a sawi bawk.

Thingtlang mite hmasawnna tur leh eizawnna ngelnghet an neih theihna turin NABARD hi July 12, 1982 khan din a ni a. Agriculture leh Rural Development-ah nasa takin tha a thawh a ni. Mizoram-ah chuan kum 1989-ah lo lutin tunah hian Regional Office neiin General Manager kaihhruaina hnuaiah an awm a, Mizoram State Government, Bank leh Financial Institution dangte bakah NGO te nen tangho in hma-sawnna hna an thawk a ni.

NABARD kum 40 tlin lawmna ah hian NABARD General Manager, Lalfakzuali Langel chuan NABARD nihphung leh hnathawh dan tlangpui a tarlang a, MCAB kaltlanga NABARD hmalakna pawimawh tak, PACS Development Cell hmalakna ngaihthlak a nih bakah ‘Success Story of 17 PACS in Mizoram’ tih lehkhabu chu Minister hian a tlangzarh bawk. Khuallian hian NABARD-in Mizoram Rural Bank hnena an pek, Mobile ATM Van chu a vailiam nghal bawk.