Chanchin thar thenkhat :

Khawzawl DC in Media kawm

Khawzawl District Bawrhsap, Zoengsanga chuan Khawzawl District-a MJA member-te leh Cable TV neitute chu niminpiah khan kawmin COVID-19 hrileng mek darh zel tur doletna kawnga hmalakna chungchang a sawipui a. He hunah hian Bawrhsap chuan an District-ah hri kai awm thin mah se tualchhung-ah inkaidarh a awm lo chu lawmawm a tih thu a sawi a, thunun zawhloh khawp hri kai an awmlo chu hri do kawnga thawktute thawhrimna leh mipuite thuawihna vang nih thu a sawi bawk. Khawzawl District ah hian hri kai mi 97 hmuhchhuah an ni tawh a, tunah hian mi 92 enkawl dam ni tawhin hri leng dona Dan bawhchhia mi 386 man an awm tawh bawk a ni.

JAC in Mizoram sawrkar phut

Joint Action Committee on Innline Reserved Forest Demand, Mizoram chuan June 29, 2021 a Assam Police leh mi engemaw zat in Mizoram chhung Vairengte ram, Aitlang-a rawn lut a mimal thlam leh Huan thlai te an rawn tichhia chu an dem takzet tih sawiin, hetianga Assam sawrkar in mahni ram ni lo a rawn chuhpui fo chu an hre-thiam lo tih an sawi a. Hetiang a Assam sawrkar in buaina an rawn siam hian kan sawrkar pawh ngawi mai lova hma laa ram leh hnam humhalh nan a kan Police Force te pawh chetchhuah tir a kap ngam hial tura an phut thu pawh an sawi bawk.

TNT-ah Sample enfiah leh

Tunhnaia COVID-19 hri kai thahnem tak hmuhna, Thutak Nunpuitu Team (TNT) Centre, Muanna Veng-a 4C-ah nimin khan hri kai enkawllai te chu Sample enfiah sak leh an ni a. Hri kai enkawl mek mi 546 te Sample enfiah ah mi 527 te chu hri lakah fihlim tawhin midang 19 te erawh chuan hri an la kai thung a ni. TNT Camp-a COVID-19 positive zingah hian mi 3 chu ZMC-a enkawl tura refer an ni a, an zinga 2 chu an dinhmun a ngaihtuahawm deuh ni a thu-dawn niin June 24-a hri kai hmuh mi 125 te chu enkawl mek an la ni bawk.

BJP in hmalak zel an tum

BJP Mizoram Pradesh President, Vanlal-hmuaka chuan Myanmar ram buaina avanga kan unau, sa himna zawnga kan ram-a rawn lut te lo dawngsawnga, lo mikhualtu te chungah lawmthu sawiin, raltlan te chungchang hi Central sawrkar ah a theih anga an thlen thin thu leh hma an lak chhunzawm zel dawn thu a sawi bawk.

Thutiam hlen turin phut

ZPM Thalaite chuan thuchhuah siamin Mizo-ram sawrkarin Oil Palm chîngtute puihna tur Support Price, Oil Palm Kg 1-ah Rs.4.50/- zèl pek tura a lo tiam tawh Vawiin thlenga a taka kut hnathawktute'n an la dawng lo chu pawi an tih thu leh hriatthiam har an tih thu sawiin, sawrkar chu an thutiam hlen thuai tura an phut thu an sawi bawk.

MPCC in Remna ni-ah mipuite chibai an buk

Mizoram Pradesh Congress Committee (MPCC) Media Department chuan nimin Remna ni-ah khan Mizoram mipui chibai an buk tih thuchhuah siamin an tarlang a. Zalenna sualtu Hnam sipaite bakah rambuai avanga nunna chan ta zawng zawngte zahna an hlan nawn leh tih pawh sawiin, kum 1986-a remna leh muanna a thlen atanga kum 35 chhung lek hian Mizoram chuan nasa takin hma a sawn tih an sawi a. Thangthar lo awm leh zel turte hian remna leh muanna hlutzia kan hriat nawn leh fo a ngai tih pawh sawiin, remna thlentute ngaihhlutna chang pawh kan hriat thar zel an duh takzet tih an sawi bawk.