Latest News

MPCC in Electric Bill siam dan endik an duh

Mizoram Pradesh Congress Committee (MPCC) chuan P&E Department in Electric Bill an siam dan chu endika siamthat an duh thu sawiin, Metre Reading ti lova Bill siam chu sawrkar mangang sum tuakna a ni em tih chu an zawhna a ni tih an sawi.

Zirtawpni-a thuchhuah an siam ah MPCC Media Department chuan P&E Department in Metre Reading ti lova July thlaa pek tùr Electric bill an siam danah thil fello tak awma an hriat thu sawiin, July thla bill hi thla kalta te aia nasa taka tamin, chhungkaw tam takin Lock-down avanga sum an thawhchhuah theih loh laiin an êng chhit thin man aia tam daih an chawi a ngai dawn niin an sawi a.  Hemi chungchangah hian mipui lungawina ngei tura a chhan dik tak sawifiah tùrin Mizoram sawrkar an phut thu an sawi a ni.

Hei bakah hian MPCC thuchhuah chuan Electric hman man bill thar ber hi whatsapp Group hrang hranga thehdarh theih turin PDF file-a siam a ni tih sawiin, mipui hnenah Online a pe tura hriattir mek a nih thu leh P&E hian thla thum chhung bill pekna chawhrual (Average) atanga bill thar hi siam angin thuthang awm mah se, Official in hetiang thuchhuah hi tun thlengin a la awm lo thung niin an sawi.

MPCC chuan COVID-19 avanga Lock-down hunrei tak neih a nih chhung leh, mipui sum lakluhin tlakhniam lam a pan mék laia mipui rawk zawnga Mizoram sawrkar a khawsa leh thin chu tha an tihloh thu sawiin, Sum lakluhna tlakhniam avanga bill pe theilo te ngaihhnathiam zawk tùra sawrkar an phut thu an sawi a. PHE in Metre Reading an tih theih lai a, P&E Department in Metre Reading ti lova, mipuite chawi tur tam zawnga bill thar an siam chu sawrkar mangang sum tuakna a ni em tih chu an zawhna a nih thu an sawi bawk.

Comments

Chhiar Hlawhte