India Formosa Foundation-in Serchhip District-a chhungkaw 1311 tan chhawmdawlna an sem

COVID-19 hri leng avanga mipuite harsatna chhawk zangkhaina atan India Formosa Foundation (IFF) chuan Serchhip District chhunga Village Council 48-a chhungkaw 1311 te hnena buhfai leh chawhmeh chi hrang hrang an sem.

Heng chhungkaw mamawh te hi nimin chawhnu khan Serchhip-a Assam Rifles Camp atanga semchhuah a ni a, India Formosa Foundation-a Chairman, Jonathan Lalremruata chuan ram dangte nen a an thawhhona kaltlangin hri leng avanga mipuite harsatna chhawk zangkhaihna Mizoram chunga District zawng zawngah tanpuina semchhuah an tum tih sawiin, AMC huamchhunga Local Council 83-a chhungkaw 4150 te hnenah tanpuina hi an lo sem tawh thu leh, heng bakah hian Thenzawl-a chhungkaw 280 leh Kolasib District-a chhungkaw 290 te hnenah tanpuina an lo sem tawh thu a sawi bawk.

India Formosa Foundation (IFF) hi NGO pakhat niin ramdang-a NGO dangte nena thawkho thin an ni a, COVID-19 hri leng mek avanga mipuite harsatna tawh sutkianna atan hian Serchhip District chhunga Village Council 48 huamchhunga chhungkaw 1311 te hnenah nimin khan chhawmdawlna hi semchhuah niin chhungkaw pakhat tan hian buhfai leh Alu Kg. 2 ve ve bakah Dal, Chini leh Chi kg. 1 theuh bakah tel litre khat leh Nutrela kg. chanve zel semchhuah a ni a, hei bakah hian heng VLTF hrang hrangte hnenah hian Face Mask 50 theuh, a vaiin 2400 semchhuah a ni bawk a ni.

India Formosa Foundation (IFF) hian Mizoram Sawrkar hnenah N-95 Mask leh Three Layer Mask, RT-PCR Test kit, PPE leh Oxygen Concentrator an lo hlan tawh bawk tih an sawi a. Tun tuma chhawmdawlna semchhuahna tur atan hian District thuneitu ten VLTF hrang hrangte hnen atanga chhawm-dawl ngai an lo lakkhawm tawh te chu an hmang tih kan Palai hnenah an sawi bawk.