Latest News

COVID-19 hri danna la thei chin zawng ten hri danna la vek turin Serchhip CMO in a sawm

Image
Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

Chanchin thar thenkhat :

Accreditation Card sem

Lawngtlai District Information & Public Relations Officer, C. Lalhruaitluanga chuan nimin khan Lawngtlai District-a Accredited Journalist te hnenah Press Accreditation Card a sem a, Lawngtlai Press Club-a he hun hmanna ah hian Lawngtlai DIPRO chuan hripui leng vangin kumin-ah Accreditation Card semchhuah mai theihloh a ni chu pawi a tih thu sawiin, Lawngtlai District-a MJA Member mi pasarih (7) lai Accredited Journalist an ni thei chu lawmawm a tih thu a sawi bawk. Nimin-a he hun hman zawh a nih hnu chawhnu lamah Journalist Workshop neih zui nghal niin DIPRO chuan Journalist te din-hmun leh hmasawnna tur leh tanlakna tur hrang hrang a sawi bawk.


Hliam tuar mek tlawh

Health and Family Welfare Board Vice Chairman, Dr. ZR. Thiamsanga MLA chuan tun thla ni 26-a ramri buai avanga Mizoram Police leh Assam Police te inkahna a hliam tuar  PC Lalmuan-sanga (24), Vairengte chu nimin khan Aizawl Civil Hospital-ah a tlawh a, thachhuak leh thuai tura duhsakna hlanin Rs. 10,000/- in a kan bawk. Civil Hospital-a Medical Superintendent, Dr. Lalhmuchhuaka chuan PC. Lalmuansanga hi a malpui dinglam-ah kah tlang niin hei hian a veilam fuh lehin vei lamah hian a mu atan mek thu a sawi a, a nunna atan a hlauhawm awm a lan loh thu a sawi bawk.


Baptist in CCC an hawng

Baptist Church of Mizoram (BCM) chuan natna dang leh COVID-19 kai kawp te enkawlna tur, Baptist Covid Care Centre (BCCC) chu Lunglei Ramzotlang-ah siamin nimin khan BCM President, Rev. V. Laldingliana chuan a hawng a. BCCC-ah hian khum 24 dah phawt niin Doctor pakhat leh Nurse pathum bakah thawktu dangte nen mi 15 in an vil dawn a ni. Nimin a hawn tak BCCC hi Christian Hospital peng ni lovina enkawltu chu BCM Administrative Department a ni dawn a ni.


Phullem phah mek tlawh

Khawzawl Mualvawm Field-a Astro Turf phah tura hna thawh mek leh Pavilion tur sak mek chu nimin khan Khawzawl DC, Zothanmawia chuan a hmunah kalin hnathawh a enfiah a, hna tha, rintlak leh rotling siam turin hna thawktu Contractort-te chu a chah bawk. Khawzawl Mualvawm Field siam hna hi UD&PA Department kaltlangin cheng nuai 476 chuang sengin Syncotts International ten an thawk mek a, Pavilion sak hna hi Rs. 371,67,171.74 sengin Contractor dangin an thawk mek bawk a ni.


MPCC Boundary Committee in inkahna hmun tlawh

Mizoram Pradesh Congress Committee (MPCC) Boundary Committee Chairman, KS. Thanga chuan niminpiah khan tunhnaia Vairengte dai-a inkahna hmun a tlawh a, hei bakah hian Aitlang ram-a Assam Police in Mizo huan an chhuhsakna hmun chu tlawh nghalin, Mizo Police te awmna chu inkahna thlen palh thil thuah Mizo Police te tan a him lo hle nia an hriat thu a sawi a. Mizoram Sawrkar in a ranglama zirchiang a, hmala vat tura a duh thu a sawi bawk. MPCC Boundary Committee Chairman hi MPCC General Secretary atangin H. Zothangliana leh PC. Laltlansanga te bakah hruaitu dang ten an tawiawm a, Sipaite chu an chawhmeh man atan Rs. 4000/- an pek bakah Assam sipai ten an kahhliam chu Rs. 5000/- a kanin, Vairengte Jt. VC kutah Rs. 10,000/- chu MPCC hmingin a pe bawk.


Judicial Inquiry din turin sawrkar laipui phut

ZPM General Hqrs. chuan tun thla ni 26-a India Union chhunga khua leh tui thuhmun, State pahnih Police-te ralthuam neih that ber ber hmanga an inkap ringawt mai kha thil zahthlak tak a ni tih nimin khan thuchhuah siamin an tarlang a. Hei vang hian sawrkar laipui chuan he thil thlen chhan dik tak a hre ngei tur a ni tih pawh sawiin, thu dik hre turin tan bik nei hauh lova chhui chiang tur Judicial Inquiry a din ngei tur a ni tih an sawi bakah, a mawhphurtu dik tak chu a phu tawk hremna pek ngei bawk tur a ni, an ti.

Comments

Chhiar Hlawhte