Latest News

Serchhip District-a khaw 19-ah Vaimin chingin FAW vangin tharchhuah tlahniam lo turah ngai

Agriculture Department hmalakna in kumin hian Serchhip District chhunga khaw 19-ah Vaimim chin niin heng khua-a Vaimim tharchhuah te hi sawrkar chuan a lei sak leh dawn a. Vaimim beitu rannung, Fall Army Worm (FAW) chu kumin hian awm leh mahse Vaimim tharchhuah lamah erawh nghawng nei lemlo tura ngaih a ni.

Serchhip-a Agriculture Department hotute hnen atanga LENKAWL thu dawn danin kumin hian Special Assistance to States Under Capital Expenditure hnuaiah Serchhip District chhung khaw 19-a Vaimim ching tur hian hmalak niin hemi atang hian Vaimim chi pawh quintal 30 hmuh a ni a, heng khaw hrang hrangah hian Vaimim ching tur hi thlan leh niin ram Hectare 206.60-a zau-ah Vaimin hi chin a ni a, kum hmasa lama lo kalpui tawh angin kumin hian Vaimim hi hlawhtling taka chin theih beisei a ni. Kumin a Vaimim chinna khua te hi Lungkawlh, Mualcheng, Sailulak, Chekawn, Serchhip (Zawlpui), Hmuntha, Khawbel, Hmunzawl, Ngentiang, Hualtu, Chhingchhip, Thentlang, Sialhau, Hriangtlang, Khawlailung, Hmawng-kawn, New Serchhip North, Chhiahtlang leh Zote South te an ni.

Agriculture Department hotute chuan Vaimim beitu rannung, Fall Army Worm chu kumin hian Serchhip District chhunga Vaimim chinna hmunah hian hmuh tur a awm leh tih pawh sawiin, kum hmasa lama hmalakna a lo awm tawh avangin Vaimim chingtute pawhin a beih dan an thiam tawh thu leh sawrkar atangin damdawi chi hrang hrang pe-a hma an lak bawk thu sawiin, hei vang hian kumin hian Fall Army Worm hi an thunun tawh thu leh Vaimim tharchhuah kawngah pawh nghawng neilo tura an ngaih thu an sawi a. Serchhip District chhunga khaw 19-ah hian FAW tuartu chhungkua 473 an awm thu sawiin, tunah hian hmun thenkhat ah chuan FAW hi hmuh tur la awm mah se ruahtui a tlak mumal tawh avangin harsatna thleng zui lo tura ngaih a nih thu an sawi bawk.

Serchhip District chhunga Vaimim chinna khaw hrang hrangah hian kumin hian Vaimim quintal 4132 vel tharchhuak thei tura an inbeisei thu Agriculture Department hotute chuan sawi bawkin, hectare khat-a zau-ah hian quintal 20 vel zel thar tura an inbeisei thu an sawi a. Heng Vaimim tharchhuah te hi a ro-a nuaithlak hnuah Department chuan Kg. khat Rs. 20/- zela an lei sak leh dawn thu pawh an sawi a ni.

Comments

Popular News (Last 30 Days)