Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Exit Test neih tawh loh tur IMA in a him ah an ngai

Indian Medical Association (IMA), Mizoram State Branch-in COVID-19 hri kaite endik nawn (Exit Test) nei lova inchhuah tir dan thar chu mithiam zirchianna (Scientific evidence) behchhan a nih avangin himah an ngaih thu an sawi.

IMA Mizoram State Branch President, Dr. Rosangluaia chuan nikum atang tawh khan Exit Test ngai tawh lova Covid damlo recover te chhuah tur hi India ram State dang leh khawvel ram dangah pawh an lo kalpui tawh tih sawiin, “Keini pawhin mithiamte zirchianna behchhan a nih avang leh damlo kan chhuah tirte atanga inkaichhawng tumah an awm kan hriat si loh avangin a himah kan ngai a ni,” a ti.

Dr. Rosangluaia chuan, “Natna hrik dangte ang bawkin tuna Virus pawh hi mihring taksa-ah a dam reng thei bik lo a. Pathian in natna hrik a siam dan hi hriatthiam a har khawp mai,” a ti a. Malaria natna te pawh PF hi ben-vawn a ni ngai lo a, PV an benvawn thin nia sawiin, “Malaria PF hi benvawn a nih lohna chhan chu benvawn theihna turin natna hrik hian mihring taksa-ah awmna tur a nei tlat lova. Chutiang chiah chuan Covid Virus pawh mihring taksa-ah a hrik la awm pawh ni se, a inkaichhawn theih loh hrik pai kha a hlauhawm tawh lo a ni,” a ti.

Covid chungchangah hian ngaihdan nei tam tak an awm thu leh chhuah dawna in test nawn loh dan kalphung pawm harsa ti tam tak awm an rin thu an sawi a. “Natna hrik pawh lo la pai mah se, an positive emaw, negative emaw a innghat lovin, a inkaichhawn theih tawh loh tih Scientific proof a awm avanga chhuah theih an ni. Center for Disease Control, USA lam phei chuan ni 10 hnuah hna zawm leh tur an ti tawh hial zawk,” tiin, natna langchhuak nasa (serious) leh damdawi In-a dahluh ngai chin te erawh chu Exit Test la tih sak vek an nih tur thu a sawi bawk.

Comments

Chhiar Hlawhte