Inkah hi a that zawkna awm se chuan kan kap daih tawh ang - DC Kolasib

Kolasib District Bawrhsap, Dr. H. Lalthlangliana chuan tunhnaia ramri-a buaina thleng chungchangah, “Inkah hi a that zawkna awm se chuan kan kap daih tawh ang,” a ti a. Vairengte-a nimin-a VC leh NGO Joint Meeting chuan Inner Line Reserve Forest 509 Sq.miles chu Mizoram sawrkar in lalet tawh se an duh thu an sawi bawk.

Nimin khan Vairengte SDO (C) Conference Hall-ah Vairengte Joint VC, Vairengte NGO leh Joint Action Committee on Inner line Reserved te chuan Meeting neiin he hun hi Kolasib DC, Dr. H. Lalthlangliana chuan a telpui a, Kolasib DC chuan tunhnai a Aitlang-a Assam nen a buai chungchang sawiin, “Inkah hi a that zawkna awm se chuan kan kap daih tawh ang. Firing order kan pe ngam lo a ni lo a, kan Police te pawhin an kap ngam lo a ni lo a, mahse inkah hi a tulin kan hre lo a ni. Bairabi Zophai-ah pawh inkah a tul nia kan hriat chuan Firing Order kan pe a. Assam lam an in hnuhdawh avangin kan inkap ta lo chauh a ni a. A tul chuan Firing Order hi kan pe ngam,” a ti.

Kolasib DC chuan tuna kan buaina ah hian Assam lam hi ruahmanna tha tak nei sa in an rawn che tih pawh sawiin, a dolet nan hian fing taka hma kan lak ve a ngai tih a sawi a. “Kan Police Camp siam an rawn thiat te kha National Media lamah kan tarlang a, kan chan titha tu a ni a. 'Rulin ka mei rap se, kei in chu i la' a ti e an tih ang khan fimkhur taka che a, an chetsualna remchang a kan lak thiam a tul a ni,” a ti bawk.

Vairengte khawtlang tanrualna leh insum theihna pawh Kolasib DC chuan fakin, “Khaw dang atangin min puih chak tak tak pawh an tam tih kan hria a. Mahse tun dinhmun ah chuan rawn inrawlh lo in, a chin hre sa Vairengte mipuite kutah dah ngam se ka duh a ni,” a ti a. “JAC on Innerline Demand ten Document lamah tan lo la in Sawrkar ah an tih tur lo ti se, keini’n a Ground Level-ah kan tih tur kan ti bawk anga. Kan theihna zawn theuh ah kan tanrual a ngai a ni, a ti bawk.

He Meeting hi Vairengte Joint VC Chairman, R. Lalfamkima chuan kaihruaiin F. Ngurbiakvela, Chairman JAC on Inner Line Reserved pawhin thu sawiin, Boundary Commission hi 1953-ah din a nih tawh thu a sawi a, JAC on Inner line Reserved te chuan 1875 Demarcation an pawm thute, Prime Mimister hnenah Memorandum an thehluh tawh thute a sawi bawk.

Nimin-a Joint Meeting hian Inner Line Reserve Forest 509 Sq.miles Assam Sawrkar Forest Department in an enkawl lai mek chu a rang thei ang berin Mizoram Sawrkar in la let in enkawl ve tawh se an duh thu Resolution siamin an pass a, “Mizoram Sawrkar hian ramri-ah buaina a chhuah apianga, rang tak leh a tul anga an chet chhuah zung zung theih nan a rang thei ang berin kan Police Force te hi ramri dep ah hmunpui siam in dah rawh se,” an ti bawk.