Minister pahnih in Saihapui 'V' a Duty an tlawh

School Education Minister leh Rural Development Minister te bakah Serlui bialtu MLA te chuan nimin zing khan Saihapui 'V' a Mizoram Police duty-na hmun an tlawh.

Tunhnaia ramri-a buaina thleng avanga Kolasib District-a awm mek School Education Minister, Lalchhandama Ralte leh I&PR Minister, Lalruatkima bakah Serlui bialtu MLA, Lalrinsanga Ralte te hian nimin zing khan Saihapui 'V' hi an tlawh a, he hunah hian Education Minister chuan ramri khua tih hmasawn chu Mizoram Sawrkarin a ngaih pawimawh thu sawiin, chumi tur chuan Saihapui 'V' Primary School, mi tutih hriat loh ten Bomb an tihpuah avanga hun rei tak rauhsan tak chu, helai hmuna awm ten tangkai taka an hman theih nan thawmthat mek a nih thu a sawi a, changtlung zawk a thawmthat dan tur a enpui nghal bawk a ni. Education Minister chuan hrileng avangin zirna In chu khar rih ni mahse, a remchan veleh a zirtirna kalpui nghal a nih theih nan Saihapui 'V' School building bakah Office leh inthiarna te sak that dan tur ruahmanna a siampui nghal a, zirtirtu turte pawh ngaihtuah nghal a nih tur thu a sawi bawk.

Rural Development Minister Lalruatkima pawhin Saihapui 'V' IR Duty post-a Mizoram Police duty-te chu a tul apianga hman turin sum fai a hlan a, inpekna thinlung nen ramri ven hna chu chhunzawm zel tura chahin, Saihapui 'V' leh Phainuam khawtlangte nen tangho thiam a, thawkho zel turin a fuih bawk.