Laldenga Thlan-ah zahna pangpar dah a ni

Nimin July 7, 2021 kha MNF Founder/President, Laldenga thih champha vawi 31-na niin he ni pual hian nimin zing khan Aizawl Treasury-a a thlan-ah MNF party hruaitute leh a nupui bakah Minister thenkhat ten zahna leh chibai bukna pangpar an dah.

Laldenga thih champha ah hian hri leng avanga Programme dang hmang lovin a Thlan-ah hian MNF President, Zoramthanga leh Elected OB te bakah a nupui Lalbiakdiki te, MNF National Core Committee members leh Minister ten Pangpar hi an dah a ni.

Laldenga hi July 11, 1927-ah Lunglei Pukpui khuaah a lo piang a, kum 1944-ah British Indian Army sawmin kum 1959-ah Mizo National Famine Front chu a ho-a din a ni a, chu pawl chu October 22, 1961-ah Mizo National Front (MNF) tiin thlak a ni. He a pawl din Mizo National Front-ah hian a thihni thlengin President dinhmun a chelh a ni. Laldenga hi kum 1986 khan Mizoram sawrkar lailawk (Interim)-ah Chief Minister a ni a, kum 1987-a Mizoram State Assembly inthlan hmasa berah Sateek leh Aizawl North-II bial atanga thlantlin niin State nih hnua Chief Minister hmasa ber a ni.

Kum 1990 khan Cancer a nih hriatchhuah niin, Memorial Sloan Kettering Cancer Centre, USA-ah thla thum enkawl a nih hnuin Mizoram pana an rawn haw kawngah Ashford Hospital, London-ah July 7, 1990, India sana-a tlai dar 2:30-ah a thi a. A ruang hi July 11, 1990 tlai dar 4:30-ah Tuirial Airfield-ah Helicopter-in rawn phurh thlen a ni a, July 13-ah ropui taka vuiliam niin, Mizote zinga State Funeral-a vui awmchhun a la ni.