Latest News

Inner line Reserved Forest Mizoram a ni tih sawi

JAC on Inner Line Reserved Forest Demand chuan Inner line Reserved Forest chu Mizoram (Lushai Territory) ta ngei a ni tih sawiin, Assam sawrkarin hun rei tak an enkawl hawh tawh chu Mizoram sawrkar in enkawl tawh tura an duh thu an sawi.

Nimin khan Aizawl Press Club-a thuthar thehdarhtute an kawmnaah JAC on ILRFD hruaitute chuan, tuna Mizoram leh Assam buaina hi ramri a nih loh thu an sawi a. “Inner Line Reserved Forest ramri tih vek a ni a, notification pakhatah mah ramri tiin a la inziak lo a. Assam in kan ram an lo enkawl hawh chhungah anni hian ramri-ah min dahsak an tum a ni,” tiin, Inner Line Reserved Forest 509 sq miles-a zau hi Mizoram Forest Department in enkawl ve tawh tura an duh thu an sawi a. Mizoram chhung ngeia Assam sawrkar hnuaia Forest Department in vawi duai lo buaina a siam thin te a reh tawh nan October ni 3, 1953-a inremsiamna te chu thaichhiat an duh tawh thu an sawi a. Inremsiamna lehkha hi thiat nghala bawhzui nghal turin Mizoram sawrkarah an thehluh nghal tur thu an sawi a ni.

Inner Line Reserved Forest ramri chungchangah Court-a kal a tul a nih pawhin an inbuatsaih thu sawiin, “Court-a kal kan hmabak a nih pawhin document pawimawh tak tak 28 kan hai chhuak tawh a. Tunah hian document pahnih mamawh kan la nei. Assam lam hi an fing khawp a, kan document duh leh pawimawh tak takte hi Internet atangin an paih bo a; chuvangin, a dapa kan indap deuh pawh a ngai dawn a ni,” an ti a. Heng document pahnih an neih theih chuan Court-ah pawh kal se chak an inrin thu an sawi bawk.

Hachhek Constituency, Vairengte leh Bairabi ramri hrulah te Venbuk sak an tum thu te leh heng Venbuk atang hian bansan lovin chhun zan zawma ramri ven pahin mi tam takin a remchanna hmunah thlai te chinga an eizawnna hmuna siam nghal an tum thu an sawi a. Tunhma in ramri issue a awm reng rengin Police leh sawrkar thuneitute lamah an thlen pawhin uksak a hlawh ngai lem lo a; amaherawh chu, tunah chuan Police te a hmun hial thlenga an awmchilh ta chu thil chhinchhiahthlak tak nia an hriat thu an sawi a. Sawrkarin hei hi duh tawk mai lova, tun ai nasaa ramri venhim hna hi thawk chhunzawm zel tura an duh thute pawh an sawilang a ni.

JAC on ILRFD hruaitute chuan an hmalak tawhna te sawi langin Kanhmuna SDO (C) in case a file pawh chak taka bawkzui a nih thu leh Hailakandi DC pawh transfer a nih tawh thu te, transfer a nih piah lamah na taka an umzui thu an sawi a. The Schedule Castes And Schedule Tribes (Prevention of Atrocities Act) 1989 chu Mizorama hman a nih theihna tura hma la tura sawrkar an nawrnaah a hlawhtlinna an hmuh tawh thu leh hman theiha peih fel a nih tawh thu an sawi bawk.

Comments

Popular News (Last 30 Days)