Latest News

Mizoram-ah hri kai 21,246 hmuh an ni tawh

Mizoram-a COVID-19 hri kai hmuhchhuah chu 21,246 an tling tawh a, hri kai hmuhchhuah zinga 17,661 te chu enkawl dam an ni tawh bawk.

Inrinni khan Mizoram-ah Sample 3596 enfiah leh niin heng te atang hian COVID-19 hri kai 243 hmuhchhuah an ni a, Sample enfiah atanga za zela 6.75 te chuan hri an kai a ni. ZMC-a Laboratory-ah Sample 1059 enfiah niin hri kai mi 42 hmuhchhuah an ni a, heng hri kai hmuhchhuah te hi Aizawl District-a Sample lak vek niin hri kai tawh nen inkawmhnaihna neih atanga kaichhawng leh inkhunghrang lai te an ni a, Armed Veng South-ah hri kai mi 12 hmuhchhuah niin Veng khat-a hri kai hmuh tamna ber an ni bawk.

District hrang hranga TrueNat Laboratory-ah Sample 194 enfiah niin hri kai 24 zet hmuh an awm a, heng zinga 18 te chu Lunglei District a Sample enfiah niin an vai hian Lunglei khawpui chhung ami te an ni a, Kolasib, Khawzawl leh Hnahthial District atangin hri kai mi 2 theuh hmuh niin Kolasib District ami hi tualchhung-a hri inkaichhawng niin a dang mi 4 te hi State pawn atanga hnathawk tura rawn lut an ni thung.

Inrinni khan Mizoram hmun hrang hrangah Rapid Antigen Test hmangin Sample 2343 enfiah ni bawkin hri kai mi 177 hmuhchhuah an ni a, Aizawl District-ah hri kai mi 110 zet hmuhchhuah awmin Veng khat atanga hri kai mi 10 aia tam hmuhchhuahna Veng 3 an la awm a, Tuithiang Veng-ah hri kai mi 16 hmuh niin hri kaina hriatloh an ni a, College Veng-ah mi 12 leh Chhinga Veng-ah mi 10 hmuh an awm bawk.

Kolasib District-ah hri kai mi 28 hmuhchhuah an awm leh bawk a, Lunglei District-ah mi 23 hmuhchhuah thar awmin Serchhip District ah 9, Lawngtlai District-ah 4, Siaha District-ah 2 leh Mamit District-ah mi pakhat hmuhchhuah an awm bawk a ni.

Heti hian nimin thlenga Mizoram-a COVID-19 hri kai hmuhchhuah tawh zat chu 21,246 niin Inrinni khan hri kai mi 355 enkawl dam niin nimin khan mi 407 te enkawl dam an ni ve leh bawk a, nizan thlenga Mizoram-a hri kai enkawl dam chu 17,661 niin hei hi hri kai hmuhchhuah atanga chhutin 83.12 a ni a, hri kai enkawllai 3490 an la awm mek a ni.

Hri kai zingah mi 95 an boral tawh :

Mizoram-a COVID-19 hri kai zingah enkawl dam an pun mek laiin nunna chan pawh mi 95 lai an awm tawh. Inrinni kalta chawhnu dar 1:50 khan C. Zoparliana (68), Vairengte chu ZMC-ah COVID-19 vangin a boral ve leh a. C. Zoparliana hian June 21, 2021 khan COVID-19 hri a kai tih hmuhchhuah niin June 28-ah ZMC-ah admit a ni. Heti hian nimin thleng khan Mizoram-a hri kai zingah mi 95 an boral tawh a, July thla kan hman mekah mi 2 an boral leh tawh a ni.

Comments

Chhiar Hlawhte