Governor kalchhuak tur in Mizoram chhuahsanin Chief Minister in a thlah

Mizoram Governor PS. Sreedharan Pillai chuan a hna thar, Goa Governor hna zawm turin Inrinni khan Mizoram a chhuahsan ta a, Governor hi Chief Minister Zoramthanga leh Minister thenkhat ten Raj Bhavan-ah an thlah a ni.

Governor thlahna hunah hian PS. Sreedharan Pillai chuan Mizoram-ah kum 2 tling lo hret awm mahse Mizoram leh Mizo mipuite chu a ngaina hle tih sawiin, a hriat reng tawh tur thu a sawi a. Mizoram a rawn thlen atanga reilote chhungin amah leh a chhungte chuan Mizoram mawi an tih bakah nuam an tih thu a sawi a. Hun reilote chhungin Mizoram dung leh vang a fang chhuak a, Mizoram hmun hrang hranga mipuite nen an inhmelhriat thei chu vannei a intih thu a sawi bawk.

Mizoram Governor a nih hnu rei vaklo ah COVID-19 hripui a rawn leng nghal tih pawh sawiin, he hrileng dona kawnga Mizoram sawrkar hmalakna te chu chhuanawm a tih thu Chief Minister a hrilh a. COVID-19 hrileng a la reh loh avangin Mizoram mipui te pawh tha taka sawrkar thawhpui chhunzawm zel turin a ngen a. An awm chhung reilot ea Mizoram mipui te duhsakna leh thlawpna te, Chanchinbu miten tha taka an thawpui avangte in lawmthu a sawi a. A awmloh hnuah pawh a hla thu chham, Mizoram mawi a tihzia a phuahchhuahna “Oh, Mizoram” chu chhiar a nih chang apianga amah hrechhuak leh thin turin ngenna a siam bawk.

Chief Minister Zoramthanga chuan Governor chu hun reilote an awm chhunga Mizoram leh mipui tan theihtawp an chhuah avangin lawmthu a hrilh a. COVID-19 hripui leng avanga hun harsa State in a paltlang laia Raj Bhavan lam pawn a remchan dan ang anga theihtawp an lo chhuah thin chu lawmawm a tih thu a sawi bawk a. State hotu luber a nih anga a hna tlin taka a thawh bakah lehkha ziakmi a nih anga a hlawhtlinnaah te Governor chu a lawmpui tak zet ti sawiin, duhsakna a hlan bawk.

Chief Minister hi Health Minister Dr. R. Lalthangliana leh I&PR Minister Lalruatkima ten tawiawmin Governor Pillai leh Lady Governor Retha Sreedharan Pillai te chu ngaihhruihna thilpek an pek bakah an hna thar tur tha taka an thawh theihna turin duhsakna an hlan a ni.

October 25, 2019 khan India President chuan Mizoram Governor atan P.S. Sreedharan Pillai chu ruatin November 5, 2019 khan Mizoram Governor 21-na atan Raj Bhavan-ah rinawmna thu tiam tirin lakluh a ni a. Tunah hian Mizoram Governor atan Dr. Kambhampati Hari Babu ruat niin tun thla chawhnu lamah Governor thar hi lakluh tur a ni ang.