ZLP in ramri chungchanga hmalakna beitham an ti

ZPM Legislature Party chuan tunhnai lawka kan ram chhunga Assam sawrkarin a sipaite a rawn tir ta mai leh a lo nawrlet tura beitham taka hmalakna a awm chu pawi an tih thu an sawi.

ZPM Legislature Party hi niminpiah khan thukhawmin ramri chungchanga harsatna kan tawh te an sawiho a. Kan ramri buai chinfel dan hria inti sawrkar kan hrawn mekin ramri buai chinfel dan turah tihngaihna a hrelo leh ta lutuk chu pawi an tih thu sawiin, harsatna kara Vairengte khawtlang leh an hruaitute hmalakna chu fakawm an tih thu an sawi a. Anni zarah hian kan ramri thui tak hi kan la hum nia an hriat thu an sawi bawk.

ZPM Legislature Party chuan tunhnai lawka kan ram chhunga Assam sawrkarin a sipaite a rawn tir ta mai leh a lo nawrlet tura beitham taka hmalakna a awm chu pawi an tih thu sawiin, “Kan ram chhanhim tura kan sipaite thuam an nih dan phei hi chu zahthlak kan ti takzet a ni,” an ti a. “Kan sipaite hian chaw ei turin km 4 an kal a ngaih bakah an duty-na hmuna awmna/bungrua mumal nei lova an awm laiin Assam lam chuan an sipaite chu Generator leh thil tha tam tak nen an thuam thei hian kan sawrkar rilru a hriat theih a. An duhna lama sum sen an hrehlo em em laia kan sipaite’n an phu tawk anga ngaihsak an dawng lo hi kan dem hle a ni,” an ti a. “Kan sawrkar hian kan ramri vengtute hi bungrua leh hmanraw tha lo pe turin kan ngen sak duh a. Assembly Session leh mipui punkhawmnaa tawngka chauha an thlavang hauh leh sum tam zia sawi vak vak lo hian a taka thiltihin, Budget-ah leh anmahni thlamuan tura penchhuak chunga an tlavang hi hauh ve tawh turin kan sawrkar hi kan ngen takzet a ni,” an ti bawk.