Latest News

Department pathum te hmalakna thlirho a ni

Health & Family Welfare, Commerce & Industries leh Higher & Technical Education Department-a hmalakna te thlirin Consultative Committee thutkhawm chu nimin khan Minister, Dr. R. Lalthangliana hovin neih a ni.

He thutkhawm SAD Conference Hall-a neih ah hian heng Department-a hotute bakah Govt. Deputy Chief Whip Lalrintluanga Sailo leh MLA te atangin Prof. F. Lalnunmawia, H. Biakzaua, C. Ngunlian-chunga leh Andrew H. Thangliana te an tel a. Kumin a thutkhawm hmasak ber ah hian Dr. R. Lalthangliana chuan hripui leng karah hmasawnna hna duh angin sawrkarin a thawk tha thei lo chunga department hrang hrangin mipui leh ram hmasawnna tura theihtawp an chhuah chu lawmawm a tih thu sawiin, a Department chan hrang hranga thawktuten an hmalakna theuh leh an Department-a thil thleng inhriatpawhtawn chu thil tul tak a nih avangin thutkhawm hi koh a nih thu a sawi bawk.

He hunah hian Commerce & Industries Department chuan Covid hri leng vanga sa leh thlai man to uchuaka zawrh chhuah a nih loh nana an hmalak dan tarlangin, man to tak taka sawrkarin a lei thin PPE Set chu Veng hrang hranga puanthui eizawnna khaihlak mek puihna ni pahfawmin Set khat zel Rs. 600 manin an thui tir tih an sawi a. Heng puanthui te hian PPE 50 zelah Rs.7500 an hlawh thei nia chhut niin a thawhkhatna ah puanthui 300 an ruai mek a, puanthui 600 rawih tumin Scheme hi siam niin Set 36,000 thui tum a ni. Interest Subvention Scheme for Entrepreneurs leh State Incentive Subsidy for MSME Sector hit by COVID-19 hnuaiah Industries Department hian cheng nuai 292 a chang a. Hemi hnuaiah State Incentive Subsidy bikah Entrepreneurs 44 hnenah cheng nuai 43 semchhuah a ni tawh a, Interest Subvention Scheme hnuaiah tanpuina dawng tur mi 180 thlanchhuah an ni tawh bawk.

Higher & Technical Education Department chuan Higher Secondary School leh College-ah te hripui avanga Class kal theih a nih tak loh avangin April 24-ah Order tichhuakin Online Class neih thin a ni tih an tarlang a. Sawrkarin zirlaite tan Fee a tihhniam sak thu leh zirna tluang pangngai bakah rilru lama harsatna tawkte pui thei turin zirtirtute chu July thla khan Counselling and Mental Health training neih tir an ni tih an sawi bawk.

Health Department pawhin hri leng chungchanga an hmalakna te tarlangin, Zemabawk Cancer Hospital sak mek chu thla 16 dangah chuan zawh theih beisei a ni tih an sawi a. Cancer hemna khawl tha chi Linear Accelarator (LINAC) khawl install vek tawh a ni a, thawktute Training pek mek niin tun thla tawpah hman tan theih beisei a ni a. Inhemna khawl dang Cobalt 60 machine Equinox 80 pawh Mizoram a rawn thlen tawh thu an tarlang bawk a ni.

Comments

Chhiar Hlawhte