Latest News

Vety Minister hovin ASF vanga Vawk chan te zangnadawmna pek dan tur sawihona neih a ni

African Swine Fever (ASF) avanga Vawk vulhtute hnena zang-nadawmna pek theih dan tur chungchang sawihona chu nimin khan AH & Vety Minister Dr. K. Beichhua hovin neih a ni.

Consultative Committee Meeting on African Swine Fever hi SAD Conference Hall-ah neih niin Member MLA te Er. H.Lalzirliana, Dr. K. Pachhunga, Lalduhoma leh KT. Rokhaw bakah sawmbik C.Lalmuanpuia leh sawrkar mi pawimawh dangte telin Vawk natna hri, African Swine Fever (ASF) avanga eizawnna atana Vawkvulhtu te hnena zangnadawmna pek theih dantur sawiho a ni a. Department hriatpuinaa vawk suat (culled) avanga zangnadawmna chu central sawrkar-ah Scheme awmsa a nih angin dil nise an ti a. Scheme awmsa-ah hian Category panga a awm a; chungte chu- kg 15 chin hnuailam-ah Rs. 2200/-, kg 15 atang kg 40 inkar Rs. 5800/-, kg 40 atanga 70 inkar Rs. 8400/-, kg 70 atanga kg 100 inkar ah Rs. 12,000/- leh kg 100 chin chunglamah Rs. 15,000/- pek theih turin then hran a ni a, Central sawrkar leh State sawrkar in zat leh zat (50:50)-a an intumsem tur a ni.

Vawk hri ASF avanga thi, suat nilo te pawh record fel fai taka kalpui a ni a, vawk vulhtute hming leh Adhaar number bakah thi zat te ziaka dah zel a ni bawk a. DM&R te nen inrawn zelin ASF avanga thi, suat (culled) ni lo te pawh zangnadawmna pek an nih theih nan a theih angin hmalak zel nise tih a ni bawk.

Mizoram-ah hian March 21, 2021 khan Lungsen khua-ah Vawk a thi tan a, Vawk hri kai te hi kan lo hmachhawn tawh thin, Classical Swine Fever (CSF) leh Porcine Reproductive and Respiratory Syndrome (PRRS) a ni lo tih rang takin Laboratory-ah finfiah nghal a ni a. April 5, 2021-ah Special Disease Investigation Team chu Lungsen khua-ah hian tirh nghal a ni a, April 16, 2021-ah ASF finfiah a ni a. March 21, 2021 atanga nimin thleng a ASF vanga Vawk thi hi 10,258 a tling tawh a, District 11-a khua/veng 163-ah ASF hi finfiah tawh a ni.

Hei bakah hian ASF ni a rinhlelh la finfiah loh Vawk thi 662 zet khua/veng 88-ah a awm tawh bawk a. ASF hri kai tawh Vawk 1230 suat (culled) tawh a ni bawk a. ASF kaihhnawiha nimin thlenga Vawk thi tawh zawng zawng chu 12,160 niin hei hi cheng vbc. 117 hu vel nia chhut a ni.

He thutkhawm ah hian AH & Vety Minister Dr. Beichhua chuan ASF avanga vanduaina tawk, Vawkvulh chungkua te a tawrhpui thu sawiin, ei leh bar eizawnna tam tak a ti khaihlak thei a ni, a ti a. Vawk thi sawngbawl kawngah Magistrate, Police, pawl hrang hrang NGO ten lungrual taka hma an la thin chu lawmawm a tih thu a sawi bawk.

Comments

Chhiar Hlawhte