Latest News

Nikum (2020) aiin kumin (2021) thla thum chhungin Serchhip District-ah Malaria kai hmuhchhuah an tam zawk

Kumin chhungin Serchhip District-ah Malaria hri kai mi 23 zet hmuhchhuah ni tawhin Malria vangin mi 2 an boral tawh bawk a. Kumin a Malaria hri kai hmuhchhuah te hi thla thum (3) chhunga hmuhchhuah vek niin nikum (2020) kumtluan-a Serchhip District-a Malaria hri kai hmuhchhuah aiin an tam tawh zawk a ni.

Serchhip CMO Office atanga thu kan dawn danin Serchhip District-ah hian Malaria hri kai hi an tlem chho thin viau a, kum 2018-ah Malaria hri kai mi 8 hmuhchhuah niin 2019-ah mi 23 hmuhchhuah an ni a, nikum khan Malaria hri kai mi 18 hmuhchhuah ni bawkin, hetianga Malaria hri kai hmuhchhuah an tlem avang hian DDT kah thin pawh kalpui ni tawh lovin khaw thenkhat ah chuan Thosilen sem niin Thosiilen sem lohna khua ah te chuan damdawi hmangin Thosilen te chiah a ni bawk a. Amaherawh chu kumin hian Malaria hri kai hmuhchhuah hi rawn pung chho thutin kumin bikah Malaria hri pai mi 23 lai hmuhchhuah an ni tawh a, nikum-a Malaria hri pai hmuhchhuah aiin an tam tawh zawk a ni.

Thudawn danin kumin-ah pawh January thla atanga April thla thleng khan Malaria hri pai hmuhchhuah awm lovin May thla-ah Malaria PV mi pakhat hmuhchhuah a ni a, June thla ah PF 7 leh PV mi 2 bakah July thla-ah ni 21 thlengin Malaria PV mi 3 leh PF mi 10 zet hmuhchhuah an ni a, thla thum chhunga Malaria hri pai hmuhchhuah te hi PV mi 11 leh PF mi 12 te niin kumin hian Malaria vanga boral mi 2 an awm tawh bawk a, Serchhip khua leh Keitum khua te an ni. Malaria hrik pai hmuhchhuah te hi Bungtlang, Hriangtlang leh New Serchhip-ah mi 3 theuh niin East Lungdar, Thenzawl leh Thentlang-ah pahnih theuh hmuh an ni a, Khawlailung, Keitum, Mualcheng, Chekawn leh Sailulak bakah Serchhip khawpui chhunga Veng pathum-ah hri kai pakhat theuh hmuh an ni bawk.

Serchhip CMO Office-a thawktute chuan Serchhip District hi tunhnaiah Mizoram pum thlirin Malaria hri pai hmuhchhuah tlemna a ni tih sawiin, kumin pawh hian khaw hrang hrangah Thosilen te semin Damdawi hmanga Thosilen chiah te pawh kalpui a ni tih an sawi a, amaherawh chu kumdang-a ruahtui tlak hun chho ah ruah a sur mumal tak loh avangin kan sik leh sa awmdan chu Malaria thlentu Thosi inthlahpun theihna atana tha tak a nih tak thu an sawi a, hei vang hian Malaria hi rawn hluar thar leh ta nia an ngaih thu sawiin, mipuite chu Thosi inthlahpun theihna remchang Tui tling te tifai-a mut-na ah Thosilen zar uluk turin an chah bawk.

Health Department-a thawktute chuan Serchhip District chhunga Malaria hrik pai hmuh-chhuahna khua ah te hian a theih anga hma an lak nghal thu sawiin, a bikin ramriak awm tamna ah te chuan ramriak te Thisen chu a theih anga enfiah sak nghal zel an ni tih an sawi a, hei bakah hian nikum lama Thosilen chiahna damdawi an hman bang, khaw hrang hrang ami te pawh lakhawmin ASHA leh Health Worker te nen Thosilen chiah hi an kalpui leh thu an sawi a, tunah hian damdawi te pawh chah belh leh mek a ni tih sawiin, hei hi an hmu thei a nih chuan ramriak mi te Thosilen hi chiah zel tum a nih thu leh mipuite zirtirna pawh hri leng karah a theih anga kalpui a ni tih an sawi.

Health Department-a thawktute chuan Serchhip District-a Malaria hri kai an hmuh te zingah hian ramriak mi leh Thosilen zar thalo an tam nia an hriat thu sawiin, ramriak mi te chu chawlhkar hnih (2) dan ah an thisen te enfiah thin tura an duh thu an sawi a. Khawsik zingah COVID-19 nia inringhlel, mahse hri kai lo te pawh Malaria hrik pai an ni thei tih hriaa Sub-Centre leh Veng tina ASHA te hnenah thisen enfiah thin tura an duh thu sawiin, Thisen en man hi a thlawn vek a nih thu leh Malaria hrik pai te pawh a thlawna damdawi pek vek an ni tih an sawi a, Malaria umbo tura theihtawp kan chhuah tlan a tul thu an sawi bawk.

Comments

Chhiar Hlawhte