Assam Police te ram luah vangin huan enkawl theilo

Sawrkar laipui Flagship Programme hnuaia intunnun tum mek Vairengte leh Saihapui ‘V’ a Kuthnathawktu te huan-ah Assam Police te an inkulh avangin Kuthnathawktu ten an huan an enkawlzui thei lova, kum tam tak an lo enkawl tawh an huan te chu an chan mai dawn nia hriain an mangan thu an sawi.

June 29 khan Hailakandi District, Assam Official te leh Assam Police 200 rual vel chu Vairengte tlaklam, Aitlang ram a HK. Ramhluna huan leh Lalchhandama, Vairengte Field Veng huan-ah lokalin, an Thlam leh Kuhva phun engemawzat an tihchhiat sak a, helai hmunah hian Assam Police te chuan Camp sain nimin thlengin an la awm zui a ni.

Hei bakah hian Vairengte chhuahlam Saihapui ‘V’ a Kuthnathawktu te huan ah pawh tunhnai khan Assam Police thahnem tak inkulh lehin, an huan leh Tuikhuah te an enkawl chhun-zawm theilo bawk.

Hetianga Kuthnathawktu te ram tih-luihna a Assam Police ten an luahsak hi Aitlang ram-ah chhungkaw 5 niin, Saihapui ‘V’ ram-ah chhungkaw 5 an awm mek a. Thudawn danin heng kuthnathawktu te hian an huan leh Tuikhuah te chu eizawnna nghet an neih theih nan Central Scheme hmang leh anmahni theih ang tawk tawka hma an lakna niin, Central sawrkar puihna a eizawnna nghet an nei tur chu hlim tak leh beiseina sang tak a an thlir laiin, Assam Police ten hnehchhuhin Camp sak nan an hman sak tak avangin an enkawlzui thei lo a ni.

Hetianga Central Scheme hmanga an eizawnna hlawhtlinpui ngei tura an beih laia Assam Police ten an huan an chhuhsak chu hriat-thiam har an tih thu sawiin, Assam Police ten kuthnathawktu te ram an chhuhsak hi an pek let vat theihna turin Central sawrkar chu a tul anga hma laksak turin an ngen bawk a ni.