Latest News

Ni khat-a hri kai hmuh tam ber ni thleng leh

Mizoram-a COVID-19 hri kai hmuhchhuah chu ala pung zel a, niminpiah khan Sample 7436 enfiah atangin hri kai 807 hmuh niin ni khat-a hri kai hmuhchhuah tam ber ni a ni a, Sample enfiah atanga za zela 10.85 te chuan hri an kai a ni.

Niminpiah khan ZMC Laboratory-ah Sample 2755 enfiah niin heng te hi Aizawl District leh Serchhip District atanga Sample lak te niin hri kai 234 hmuh an ni a, heng zinga 230 te hi Aizawl District-a Sample lak niin hri kai hmuhchhuah tamna zingah Chanmari West-ah hri kai 33 hmuh niin Sairang Dawr Veng-ah 25, Venghlui-ah 25, Bawngkawn-ah 23, Bethlehem Veng-ah 14 leh Armed Veng South-ah 12 te an ni a, hri kai hmuhchhuah zinga a tam zawk te hi hri kai tawh nen inkawmhnaihna neih avanga inkhunghrang lai an ni. Serchhip District-a hri kai hmuhchhuah mi 4 te hi BSF Sipai, tunhnaia State pawn atanga rawn lut an ni bawk.

District hrang hranga TrueNat Laboratory-ah Sample 447 enfiah niin hri kai mi 63 hmuhchhuah an ni a, Champhai District-ah hri kai mi 18 hmuhchhuah niin an zinga 12 te chu Hnahlan khua an ni. Siaha Dsitrict-ah hri kai mi 14, Lawngtlai District-ah 9, Hnahthial District-ah 2 leh Aizawl District-ah hri kai pakhat hmuh an ni bawk.

Rapid Antigen Test hmangin niminpiah khan Sample 4234 enfiah niin hri kai mi 510 zet hmuhchhuah an ni a, a tam ber hi Aizawl District-a hri kai hmuhchhuah niin mi 319 hmuhchhuah an awm a, hri kai hmuh tam zualna chu Tuirial-ah 26, Bethlehem Vengthlang-ah 19, Dinthar Veng-ah 19, Bawngkawn-ah 16, Bethlehem Veng, Muthi leh Tuikual North-ah 14 theuh, Huntharah 13, Vaitin-ah 11 leh Nursery Veng-ah 10 te an ni. Heng bakah hian Lunglei District-ah hri kai mi 84 hmuh an ni a, Kolasib District-ah 56, Mamit District-ah 23, Lawngtlai District-ah 18, Siaha District-ah 6, Champhai District-ah 2 leh Serchhip leh Saitual District-ah pakhat ve ve an ni.

Heti hian nimin thlenga Mizoram-a COVID-19 hri kai hmuh chu 28,295 an tling ta a, nimin khan hri kai mi 117 te enkawl dam leh niin heti hian nimin tlai dar 5:00 thlengin hri kai 21,805 (77.06%) te enkawl dam an ni tawh a, hri kai enkawllai 6365 an la awm mek a ni.

Hri kai zingah mi 2 boral leh :

Mizoram-a COVID-19 hri kai hmuhchhuah an pun laiin mitthi pawh an pung zel a, nimin khan hri kai mi 2 an boral leh a ni. Nimin zing dar 1:00 vel khan C. Vanlalbera (42), Saikao Siaha chu COVID-19 vangin ZMC-ah a boral a, nimin zing dar 6:30 khan K. Rochhunga (84), Bethlehem Vengthlang Aizawl chu ZMC-ah COVID-19 vangin a boral ve leh bawk a ni. Heti hian Mizoram-a COVID-19 vanga boral chu mi 125 an tling ta a ni.

Comments

Chhiar Hlawhte