Hri kai enkawlte chhuahtir dan tur siam thar a ni ta

Mizoram sawrkar chuan COVID-19 hri kai enkawl te anmahni enkawlna hmun atanga chhuahtir dan tur ruahmanna thar a siam ta.

Hemi chungchanga sawrkar thuchhuah in a tarlan danin taksa-a natna langchhuak lo te chu hri an kai tih hmuhchhuah atanga ni 10 (sawm) chhung chu uluk taka enthlak (observe) an ni anga. Enthlak chhunga a tawp lam ni 3 (thum) chhunga Khawsik an neih tawh loha harsatna an neih loh chuan chhuah (discharged) theih an ni anga. An chhuah dawnah RAgT/TrueNat/RT-PCR-a test a ngai lo ang. Discharged a nih hnuah damlo-in khawsik, khuh emaw, COVID-19 symptoms emaw a nei leh a nih chuan mahni thua in test tir mai lovin bialtu CMO emaw Covid helpline no.102/0389-2323336/03892322336/0389-2318336-ah a in report tur a ni ang.

COVID-19 hri kai natna langchhuak lo, mahni In-a awmte chu Swab Sample lak ni atanga ni 10 (sawm) chhung chu uluk taka enthlak (observed) an ni anga. Enthlak chhunga a tawp lam ni 3 chhunga khawsik an neih tawh loha, harsatna an neih loh chuan chhuah (discharged) theih an ni. Chhuah dawnah RAgT/TrueNat/RT-PCR-a test a ngai lo ang. Discharged a nih hnuah harsatna an nei le a nih chuan hri kai enkawlna hmun atanga chhuak te ang bawkin kaihhruaina siam a ni bawk.

COVID-19 hri kai natna lang chhuak te chu natna a lanchhuah atanga ni 10 (sawm) chhung uluk taka enthlak an ni anga. Enthlak chhunga a tawp lam ni 3 (thum) chhung emaw, a aia rei emaw khawsik an neih lohva, Oxygen Saturation pawh 95% aia sang (i.e, Sp02>95%) a nih bawka, harsatna an neih loh chuan chhuah (Discharged) theih a ni ang. Chhuah dawnah RAgT/TrueNat/RT-PCR a test a ngai lo ang.

COVID-19 hri kai damlo na zual leh natna benvawn neite chu ni 3 (thum) chhung khawsik an neih tawh loh bakah, ni 3(thum) chhung an Oxygen Saturation pawh 95% aia sang (i.e. Sp02>95%) a nih bawk chuan RT-PCR Test tih tur a ni a. RT-PCR Test result hi a negative chuan COVID-19 hri kai hi chhuah tir (discharged) theih a ni a, amaherawh chu chhuah (discharged) an nih atanga ni 7 chhung chu In lamah uluk takin a inkhung hrang (strict home quarantine) chhunzawm ngei ngei tur a ni. RT-PCR Test result hi a la positive chuan ni 4 (li) hnuah uluk taka ennawnin RT-PCR test leh tur a ni. A la positive zel chuan ni 28 chhung chu ni 4 (li) dan zelah la test tur a ni.

RT-PCR Test result hi ni 28 hnuah pawh a la positive zela, mahse a tawp ni 3 (thum) chhung emaw a aia rei emaw khawsik a neih si loh a, oxygen saturation 95% aia sang a nih chuan, a enkawltu Doctor te'n District Core Team for Covid Treatment rawnin, a tul angin ZMC Core Team te an rawn leh ang a, tichuan kalpui zel dan tur an rel ang.