Latest News

MJA in Mizoram sawrkar chu Journalist te tana inhawnga an inhuamna ngaihthlak sak turin an beisei

Mizoram Journalists’ Association (MJA) chuan ram leh hnam hmasawnna atan leh ram leh hnam tana tha tur ang chi ah chuan thahnemngai takin sawrkar an thawhpui zel dawn tih sawiin, Sawrkar pawh Journalist-te tana inhawng a, Journalist-te inhuamna pawh ngaihthlak sak thin tura an beisei thu an sawi.

MJA hian nimin khan Aizawl Press Club-ah General Body Meeting neiin hemi hnua thuchhuah an siamah MJA chuan Mizorama journalist-te hian tunhma atangin kawng hrang hrangin Mizoram sawrkar leh a hmalakna tha taka tawiawmin a thlawp thin tih an sawi a. Tunhnaiah sawrkar nena thawhdunna tha an neih tithuanawp thei thil journalist-te chunga thleng a awm leh zauh thin nia sawiin, “Ramri-a buaina awm chungchanga sawrkarin All Political Party, Kohhran hruaitute leh All NGO-te nena sawikhawmnaah, hun reilote chhung Video Coverage tih takngial pawh phalsak an ni lo a, phalsak an nih loh chhan leh phalsak lo tu sawichian fak tur awm lova hnar an ni chu MJA chuan hriatthiam har a ti a. Tunhma atanga rilru thianghlim taka sawrkar a lo thawhpui tawh thinna te ngaihtuah phei chuan na a ti hle a ni,” an ti.

MJA chuan he Meeting-ah hian Sawrkar miten lut turin an sawm leh hnuah journalist-te hi lut duh tawh lo anga sawi a awm tih pawh sawiin, inkhawm tan a nih atanga darkar chanve chuang kawngka pawna awm journalist-ten lut tura sawmtu tumah an awm an hriat loh thu an sawi a. “Sawrkarin inhmuhkhawm a kohin journalist-te chuan chumi chanchin hriat tum chuan theih ang angin an ngaihven thin a. Sawm an nih lohna ah pawh chanchinthar hre tura kal hi journalist hna dik tak a ni. Amaherawhchu, tel phalsak an nih lohnaah chuan tel an tum lui tlat ngai bik lo,” an ti bawk.

Ram inrina-a pawm dan inang lo avanga tunhma atanga thenawm State nen innawrna lo awm tawh thin chu tunhnaiah tharthawh a ni leh tih tlang hriat a ni tih MJA thuchhuah chuan tarlangin, “Thenawm State chuan an Media-te an hmang tangkai thiamin an thawhpui thiam thin hle. Mizoram lam tih ni miah lo ah pawh hmingchhe taka chhuah chang a nei thin a ni,” an ti a. Mizoram sawrkar hotute pawh Media-te hmang tangkai ve turin thurawn pek an ni tawh tih sawiin, amaherawh chu tun thlengin, Media hman tangkai tumna tak tak ala awm lo nia a lan thu an sawi a. Mizoram journalist zingah phai lama National/Regional Media-a ziak thin Correspondent an awm nual tih pawh sawiin, Mizoram-in a hlawkpui tur zawnga ziak turin, sawrkar hotute biak tawng theih an nei ngai lo niin an sawi bawk.

Comments

Chhiar Hlawhte