Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Health Clinic Building hawng

Lengteng bialtu MLA, L. Thangmawia chuan nimin khan a bial chhunga Changzawl khua ah Health Clinic Building a hawng. Changzawl-ah hian Health Sub-Centre a awm lova, amaherawh chu khawtlang mamawhna a nasat avangin Chang-zawl khawtlang chuan kum 2017 khan Health Clinic tur hi Assam Type hmanga sa in bultan a lo ni tawh a, amaherawh chu thawktu (Health Worker) chu dan anga sawrkar atanga pek mai theih a nih rihloh avangin MLA Fund hmangin a lo rawih sak tawh bawk a, hemi hnu hian MLA Fund atang bawkin cheng nuai 5 sengin Health Clinic Building hi a dung ft. 25 leh a vang ft. 12 a zau in sak a ni leh ta a ni.


Ration buhfai khul sakna hlan

Deputy Chief Minister leh Tuichang bialtu MLA, Tawnluia chuan a bial chhunga AAY chhungkua 668 leh PHH member 13,535 te July thla ration buhfai a khulsakna tur pawisa Rs. 2,73,165/- chu tum sakin heng te hi nimin khan Veng leh khaw hrang hranga Retailer te hnenah hlan a ni a, Deputy Chief Minister-in July thla ration buhfai a khulsak hi AAY chhungkaw 668 tan quintal 233.8 leh PHH member 13,535 te tan quintal 676.75 niin AAY chhungkaw pakhat in buhfai kg 35 zel dawngin, PHH member tinin buhfai kg. 5 zel an dawng bawk a ni.


Kolasib-ah khauh lehzual tum

Kolasib District Bawrhsap, Dr. H. Lalthlang-liana chuan nimin khan a Office-ah thuthar theh-darhtute kawmin hri leng avanga inkhuahkhirhna chu Kolasib khawchhung ah khauh lehzuala kalpui a ni dawn tih a sawi a. Thupek thar chhuah angin Magistrate leh VLTF-te phalna nei lo chu pawn chhuah phal a ni tawh dawn loh thu leh Total Lockdown erawh kalpui tum a ni rihlo tih a sawi bawk. Tunhnaiah Kolasib District-ah hian hri kai hmuhchhuah an pung nasa hle a, tunah hian hri kai enkawllai mi 381 an la nei mek a, an District-ah hian hri kai hmuhchhuah tawh zawng zawng chu 1655 niin mi 8 an boral tawh a ni.


Tui tla 2 ruang hmu nghal

Nimin tlai khan Kawnpui khaw mi ramkal pahnih chu Tlawng lui-ah an tlahlum a, an ruang pawh hmuh nghal a ni. Thudawn danin heng mi 2 te hi  an thian dang pahnih te nen Tlawng lui-ah chawhmeh zawnga kalin an pali hian tui-ah chesualin an tla a, an zinga mi 2 te chu Hortoki khaw mi ten an chhan hman a, Lalsang-liana leh Malsawmdawngzela te chu chhan hman lovin tui-ah hian an tlahlum a, tui tla hi zawn nghal niin an ruang hi an hmu nghal a ni.


CMRF-ah nuai 15 hlan

North Eastern Development Finance Corporation Limited (NEDFi) chuan COVID-19 hri kaite enkawlnaa mamawh oxygen leh a kaihhnawih hmanraw leina atan nimin khan Corporate Social Responsibility (CSR) atangin CM Relief Fund for COVID-19 ah cheng nuai 15 an hlan a. NEDFi hian CSR kaltlanga hmalakna pakhatah Mission Oxygen Programme siamin hmarchhak State 8-a Oxygen mamawh te phuhruk theihna turin rua-hmanna an siam a ni.


Kulikawn 4C tlawh

Health and Family Welfare Board Vice Chairman leh Covid-19 Medical Operational Team Chairman, Dr. ZR. Thiamsanga chuan nimin khan Kulikawn-a COVID-19 vei te enkawlna 4C a tlawh a. Mizoram pum a VLTF, LLTF, tlawmngai pawl hrang hrang leh Kohhran ho inpekna chu ropui a tih thu sawiin, hetiang a thawhhona tha hi ram dangah hmuh tur a awm ve-a a hriat loh thu a sawi a, an mamawh pawisafai bakah Face Mask, Pulse Oxymeter leh Hand Sanitizer a hlan bawk.

Comments

Chhiar Hlawhte