Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

'MSU Smart Phone for BPL/AAY Family Students Project' hnuaiah MSU in Handet 33 an dawng

Mizo Students’ Union (MSU) chuan 'MSU Smart Phone for BPL/AAY Family Students Project' kaltlangin nimin khan Smart Phone Handset 33 an dawng.

COVID-19 hri leng avanga zirlaite’n Online Class an kal thin tak avangin MSU General Hqrs. chuan 'MSU Smart Phone for BPL/AAY Family Students Project' hi kalpuiin zirlai harsate tan Mobile Handset a ngaihtuah sak a. Nimin khan John Lalpeka, Proprietor; 3:16 Plan Solution hnen atangin Smart Phone Handset 33 chu an dawng a ni.

Heng Mobile Handset inhlanna hunah hian John Lalpeka chuan Hri leng hian Mizo khawtlang-ah chhungkaw khawsak a inruallo hle tih a tilang chiang nia sawiin, “Thenkhatin dam khawchhuah nan an thawk tawk tawk a, an fate lehkha zirna atana pawimawh ber lo ni ta Mobile Handset pawh an lei hleithei lo. Chutih laiin chhungkaw thenkhata zirlaite chuan Computer, Laptop leh Mobile Handset changkang ber ber nen lehkha an zir thei thung a, Test leh Exam-ah pawh pass an harsat lovang. Hei hian nasa takin zirna quality leh zirlai personality a sàwi danglam dawn a, zirlai Smart Phone neilo chu a fail dawn tihna a ni bawk. Chuvangin, zirna kawnga zirlaite intluktlan nan leh zirlaite chawikan nan he thil hi ti ka ni,” tiin sawrkar hotute pawhin zirna kan kalpui mekah zirlaite harsatna tawh lian tak hi hre renga ruahmanna siam a nih vat a beisei thu leh chhungkaw tin pawhin kan fate zirna kawngah rilru kan pek lehzual a ngai hle tih a sawi bawk.

He hunah hian MSU President, J. Lalmuanzuala pawhin 'MSU Smart Phone for BPL/AAY Family Students Project' chungchang hi sawifiahin, Mobile Handset chu a dawng tur zirlai dik takin a dawn theih nan Institution leh khawtlang hruaitu hriatpuina tello chuan pek chhuah a ni dawnlo tih a sawi a. Mi inphalte avanga zirlai harsa ten zirna an chhunzawm thei tur chu lawmawm a tih thu a sawi bawk.

Comments

  1. A van lawm awm ve, msu in hma lakna te a ropui lutuk. Rawngbawl dan hrang hrang a awm a, rawngbawlna pawimawh tak ania
    Theih tawp chhuah zel rawh u

    ReplyDelete

Post a Comment

Chhiar Hlawhte