Latest News

Chanchin thar thenkhat :

Ngopa khaw mi 7 man tawh

Kawlbem khaw mi Daikhanlama tualthihna a pawikhawihtua puh mi pasarih man an ni tawh a, nimin khan Court-ah an chungthu ngaihtuah tura thawn an ni. Ngopa Ruihhlo Do pawl intite'n Heroin an kawl lai nen an man leh an kuta a awm laia thi Daikhanlama tualthihna chungchang hi hun engemaw chen an chhui zui hnuah Police ten nimin khan rinhlelh mi pasarih an man a, mipa 5 te District Jail-ah dah niin hmeichhia 2 chu Central Jail-ah dah an ni. Pawikhawihtu-a puh te hi Ngopa Police Station-a FIR thehluh, IPC 304 behchhana thubuai ziahluh atanga ni thum-ah man an ni. July 1, 2021 khan Daikhanlama leh a nupui hi Ngopa Ruihhlo Do pawl intite'n Heroin an kawl lai nen manin, Daikhanlama hi an dawp laia a thaw a hah vangin Ngopa damdawi In-ah hruai ni mah se, July 2 zing dar 1:00 khan a boral a ni.


Vaccine la nghak turin chah

Mizoram sawrkar chuan thuchhuah siamin Ministry of Health and Family Welfare, Govt. of India in naupai (raipuar) mek te Covid-19 vaccine pek theih an nih tawh thu July 2, 2021-a a rawn puan tawh chu Mizoram-ah pawh a taka hman thuai a nih theih nan chak taka hmalak mek a nih thu leh, hemi atan hian Inrinni leh Pathianni pawh chawl lovin Orientation/Training inpek char char a ni tih an tarlang a. MoHFW ruahmanna siam angin Vawiin hian State leh Districts tan Orientation buatsaih a nih dawn thu leh, hemi hnuah chauh naupai mek te ah Covid-19 vaccine hi pechhuak tura a rawn tih avangin hei hi lo nghak turin mipuite chu an ngen bawk.


Family Happiness Kit sem

Lunglei District Bawrhsap in hri leng avanga NGO Foundation/Company/Corporation-a CSR kaltlanga hma a lakna hnuaiah Akshaya Patra Foundation chuan Lunglei District-a chhungkaw 700 tan ei leh in tur, ‘Family Happiness Kit’ cheng nuai 10 man hlanin nimin khan sem tan a ni a, an thil sem zingah hian chaw leh chawhmeh bakah nitin mamawh thildang te a tel a ni.


Hmar tawng hmang dawn

Kum 1994-a Mizoram sawrkar leh Hmar People’s Convention (HPC) te inremna in HPC Hmar tawng chu Medium of Instruction atan Primary School-a hman tura a lo tih angin nakum atangin Sinlung Hills Council (SHC) huamchhung khaw 31 a pawl 1-ah hman tan a ni dawn a, a tah-tawl in pawl 5 thleng hman tur a ni ang.

Comments

Chhiar Hlawhte