Latest News

Chanchin thar thenkhat :

 Central YMA in lawmthu sawi

Central YMA chuan Mizoram leh Assam ramri buaina vanga hmalakna hrang hrang kalpui mek tawiawm a, nasa taka tha thawhtu, Sub-Hqrs/Group/Branch YMA-te chungah lawmthu an sawi tih thuchhuah siama tarlangin, ramri buai mek venghim tura hmun ralti a hreawm tuara awm mek Mizoram Sipai/Police-te chungah lawmthu an sawi a, huaisen taka a tul ang zela harsatna hmachhawn thei turin an ngen bawk. Central YMA chuan Ramri buai vanga Police Force-te indaihlohna nasa tak awm mek phuhruk nan, sipai pawhpen leh mimalin an kawl mekte an hna tur dik tak, an duty thawh tir turin sawr-kar an ngen bawk.


Leilaihna khawl 3 tirlut

Mamit District chhung Chuhvel khaw bul Assam ramri-a Mizoram Sipai duty pui turin nimin khan Mizoram Earthmover Owner Union (MEOU) chuan leilaihna khawl, JCB pathum (3) an tir. Tarlan tawh thin angin Chuhvel khaw dai-a John Haliday-a ram leh a chhehvelah Assam Official leh Assam sipai nia hriat te an kal thin a, hemi avang hian Mizoram sawrkar chuan sipai engemawzat ramri veng turin a dah a, heng sipai ramri a awmte awlsam taka an chetvel theih nana kawng sial turin MEOU leilaihna te hi an kal a ni. MEOU hruaitute chuan an khawl/JCB te hi Kawngpui atanga John Haliday-a ram inkar kawng awmsa siamthat te, a ram leh a chhehvel a sipai awmna hmun pawh tura kawng laih te leh mamawh apianga hman tur a kal an nih thu an sawi.


Eid-ul-Azha hman a ni

Nimin khan rampum-ah Muslim te Sakhaw ni pawimawh Eid-ul-Azha, Bakrid tia hriat bawk chu urhsun taka hman a ni a, he ni hi sawrkar Pisa chawlh-ah puan a ni. He ni pual hian hmun then-khatah chuan COVID-19 inkhuahkhirhna zawm chungin Mosque-ah tawngtaina hun hman niin inkharkhip puanna State-ah te erawh mahni In lamah tawngtaina hun hman niin ram hruaitu ten mipuite duhsakna an hlan bawk a ni.


Raltlan chhawmdawlna hlan

Nimin khan Presbyterian North Vanlaiphai Kohhran chuan Ngharchhip khua-a Myanmar mi rawn raltlan te tan chhawmdawlna chi hrang hrang an hlan a. Heng an thil hlan te hi buhfai bag 25, Dal bag 4, Alu bag 5 leh Chawhmeh chi hrang hrang niin Kohhran-a pawl hrang hrang leh Kohhran mipui ten an thawhkhawm a ni a, a then hi Koh-hran sum-a lei a ni bawk. Ngharchhip khua ah hian mi 200 vel zet raltlan an awm mek nia thu-dawn a ni a, heng thilpek hlan tur hian nimin khan North Vanlaiphai Kohhran te hi Motor pathum hmangin an thawkchhuak a ni.


Hnam phatsantu ah ngai

Joint Action Committee on Inner Line Reserved Forest Demand chuan July 20-a Aitlang a Samuel-a huan-a ram hauh nana hnatlang-a thawkchhuak te chu an chhuang takzet tih nimin khan thuchhuah siama tarlangin, chutih laia Mizo-ram Police ten tawlhkir tura thu an pe leh Assam sipai hma-a thangtlawm taka Mizo te kan awm leh chu na an tih thu leh an thinrim thu an tar-lang a. Mizote dawizep leh thangtlawm taka min siamtu chu Hnam phatsantu-ah ngaiin, hemi atana thu petu chu tu pawh nise a hna chelhlai atanga bang nghal tura an phut thu an sawi bawk.

Comments

Chhiar Hlawhte