COVID-19 hri leng mek chungchangah Chief Minister hovin inrawnkhawmna neih a ni

Central YMA huaihawta Political Party hrang hrang leh NGO hrang hrang bakah MKHC te Joint Meeting thurel bawhzuiin nimin khan sawrkar mi pawimawh zual te leh NGO, Political Party, LC/VC leh Kohhran hruaitute chuan Joint Meeting neiin COVID-19 hri leng mek chungchang an sawiho.

He sawihona Assembly Conference Hall, Aizawl-a neih hi Chief Minister, Zoramthanga chuan kaihruaiin COVID-19 do kawngah theihtawpa an bei chungin an theihna a chaurauin, an famkim tawk lo tih an inhriat thu a sawi a, “Khawvela mithiamte'n an thiamna an thawhkhawm a, tun dinhmun kan thleng a ni. Mizoram-ah pawh sawrkar, Frontline Workers, NGO, mipui, Kohhran leh Political Party-ten theihtawp an chhuah a ni,” a ti a. An hmalakna ah mi zawng zawng duhthusam an tlin loh tur thu sawiin, “Pathian pawhin tih theih tawk tih erawh a phut a ni,” tiin an hmalakna ah theihtawp an chhuah zel dawn thu a sawi bawk.

He thutkhawm ah hian Health Minister Dr. R. Lalthangliana chuan rorel thiam a har thu sawiin, “Kan hmalakna ah fuhtawklo a awm thei. Kan thurel a hnu lawka lo fuh tawklo te a awm leh thin. Tih dikloh leh tihfuh tawklo ah ngaihdam kan dil. Khawvel ram ropui ber berte pawh an chefuh vek thei lo. ‘Sem sem dam dam, ei bil thi thi’ tiin COVID-19 avangin mimal leh pawl an luangchhuak nasa a, a lawmawm hle,” a ti a. Mizoram a COVID-19 hri len dan dinhmun leh hri kai te enkawlna tura hmalak dan leh ruahmanna awm mek te pawh a sawilang bawk a ni.

He hunah hian NGO Coordination Committee Chairman leh Central YMA President, Vanlalruata chuan Sawrkar chu nghet taka ding tura a duh thu a sawi a, kawng hrang hrangin nawrna tawk thin mahse sawrkar chu thu leng vel vanga ngaihdan sawh sawn mai lo tura an duh thu leh COVID-19 hripui leng dona kawngah pawh an thlawp tlat thu a sawi bawk.

He thutkhawm ah hian Mizoram in CO-VID-19 a dona kawnga rawtna hrang hrang te sawiho a ni a, rawtna lut hrang hrang te chu Chief Minister Zoramthanga chuan an lo enzui tur thu leh thurawn inpe tlang zela tha taka thawkho zel turin kalkhawmte a sawm a ni.

Party hrang hrangte thusawi :

    COVID-19 hri leng chungchangah nimin khan Chief Minister hovin inrawnkhawmna neih niin Political Party hrang hrang ten an ngaih pawimawh hrang hrang an tarlang. Congress Party aiawha tel MPCC General Secretary, H. Rohluna chuan hri danna pek chu tun aia chak kalpui an duh thu leh tun aia tamin Sample test kalpui theih an duh thu a sawi a, Health Department-a thawktu indaihlohna te pawh sawrkar in ngaihtuah vat se an duh thu leh Budget siamthat a ngai anih pawhin tih mai ni se tih chu an duhdan a ni tih a sawi.

ZPM Vice President K. Sapdanga chuan mipui chhanhim hna chak zawka thawk thei turin Health Department Budget ennawn nise an ti tih a sawi a, chumi atan chuan Special Assembly Session koh ni se tih chu an duhdan anih thu a sawi a. Zoram mipuiin nasa taka hrileng an tawrh lain sawrkarin thilpek chi hrang hrang petute chu politics mit-a thlir lo tura an duh thu leh mipui himna dah pawimawh ber tura sawrkar ngenin, Vegetable Supply Chain kalpui turin a ngen bawk.

BJP aiawha tel an thu puangtu, K. Laldinthara chuan thawktu indaihlo nasa lutuk avanga harsatna tawk te an awm tih sawiin sawrkar chu thawktu lak belh kawnga tan la turin an duh tih a sawi a. Test tam thei ang ber tih an duh thu pawh sawiin, Containment-a awm te phei chu Test vek an nih theihna tur leh a bikin Aizawl khawpui chu hrilengin a tuam nasat bik anih avangin test vek theih ni se an duh tih a sawi bawk.

He hunah hian ZNP Vice President, Lalrinmawia leh NPP President Hmingdailova Khiangte bakah PC Party atangin Lalrinzuala, Vice President te pawhin thu sawiin, sawrkar chu Covid hri leng dona kawngah thawk tha an tih thu leh an thlawp tlat thu an sawi a, tun dinhmunah chuan tanho a pawimawh zia sawiin, tumah rilru dang pu lo-a tangho zel turin an sawm bawk a ni.