Hri kai 2 hmuh belh leh

Niminpiah khan Serchhip District-ah CO-VID-19 hri kai mi pahnih hmuhchhuah niin nimin ah hri kai zingah enkawl dam an awm belh lo thung.

Niminpiah khan Serchhip District-a TrueNat Laboratory-ah Sample enfiah 19 awmin hri kai hmuhchhuah an awm lova, Rapid Antigen Test hmanga Sample enfiah 68-ah hri kai mi 2 hmuh-chhuah niin pakhat hi North Vanlaiphai khua niin hri kai hmuhchhuah tawh nen inkawm-hnaihna nei a ni a, pakhat hi Rawpui khua niin tunhnaia Aizawl atanga zin haw a ni bawk. Nimin khan BSF sipai zingah hri kai hmuh awm  lehin report kimchang hriat hman a ni lo thung.

Nimin khan Serchhip District-a hri kai te zingah enkawl dam an awm belh lova, heti hian nimin tlai dar 5:00 thlenga Serchhip District-a hri kai hmuhchhuah chu 764 niin heng zinga 737 te chu enkawl dam an ni tawh a, tunah hian hri kai enkawllai mi 24 la awmin hri kai zingah mi 3 an boral tawh bawk a ni.

Serchhip District-ah hian hri leng vanga In lama inkhunghrang mi 14 an la awm mek a, sawrkar hmunhmaa inkhunghrang mi 75 la awm bawkin Vantlang hmun-a inkhunghrang mi 2 an la awm bawk a ni.