July 24, 2021 thlengin Serchhip District-ah inkharkhipna kalpui chhunzawm a ni dawn

Mizoram sawrkar COVID-19 dona atana inkhuahkhirhna tun thla ni 24 thleng kalpui leh tura a ruahman angin Serchhip District-a inkaihhruaina kalpui dan tur pawh ruahman a ni leh ta.

Hemi chungchangah Serchhip District Bawrhsap in thuchhuah a siam ah inkaihhruaina hman mek chu tih danglam lutuk awm lovin tun thla ni 24 zan dar 12:00 thleng hman chhunzawm a ni dawn a, zirna In te chu hawn phal la ni lovin Board Exam, Recruitment Exam, adt chu sawrkar phalna la te tan tih theih a ni anga. Sakhaw biak inkhawm chu neih khap la ni mah se zing leh tlai a tawngtai neih te chu phal a ni anga, inneih inkhawm leh mitthi vuina ah mi 30 aia tam lo tel theih niin ei leh in sem phal a ni lo bawk. Public Park leh Picnic Spot te hawn phal ala ni lova, Sports Practice phal niin Indoor-ah mi 10 aia tam lo leh Outdoor-ah mi 25 aia tam lo tel theih niin District Hqrs. ah chuan Sports Association hruaitu theuh ten mipui phal zat bak aia tam an pungkhawm lo tih an enfiah anga, Zing leh Tlai-a Walking leh cycling exercise te phal a ni bawk a. Sports inelna neih erawh khap a ni thung. Mipui punkhawmna Anniversary, Birthday lawm leh thildang neih khap niin a huhova pawn chhuah (Lui kal, trekking, hiking, adventure sports, adt.) te phal ala ni lo bawk.

Construction Works (mimal leh sawrkar hnathawh) te, MGNREGA, MP leh MLA Fund hmanga hnathawh te phal niin hriselna kaihhnawih leh mipui mamawh Pisa hrang hrangte pawh hawn chhunzawm tur a ni dawn a, mimal leh pawl Office hrang hrangte pawh Thawhtanni atanga Zirtawpni thleng hawn theih a ni dawn a ni. Bungraw load leh unload hna te chu tlai lam dar 5:30 atanga zing dar 4:00 thlengin District Hqrs. ah kalpui theih a ni anga, Kawng laka lirthei chhia siam turte chu ID Card nen an kal phal niin hei hian Automobile Dealer leh Workshop hnathawkte a huam ang.

In lama thil siamna hmun hrang hrangte pawh thawh phalsak niin eichawp dawr te leh In sakna bungrua zawrhna dawr te chu zing dar 5:00 atanga tlai dar 5:00 thleng an inhawn phalsak an ni a, Gym leh Spa te hawn khap ala ni thung a, Restaurants leh Thingpui dawr te chu hawn phalsak ni mah se an dawr-a ei in phalsak ni lovin an hralhchhuak thei ang. Sawrkar Pisa te hawn tur niin Office kal vek tur a ni a, sumdawnna lirthei zingah Taxi te nitin an service phalsak niin Maxi Cab te District chhunga an service phal a nih laiin District danga kal tur erawh chuan VLTF phalna an lak a ngai a. Auto Rickshaw te chu number kawpkim leh kawpkim lo an intlanchhawk dawn bawk a ni.