Latest News

Custom Hiring Centre atan Khawl vailiam a ni

Mizoram hmun hrang hranga loneituten’a Custom Hiring Centre kaltlanga an inhmantawm tur Tractor, Power Tiller, Mini Power Tiller leh khawl chi dang hrang hrang te chu Inrinni khan Agriculture Minister, C. Lalrinsanga chuan a vailiam.

Johnson Diesel Sales & Services Depot, Sihhmui atanga huan, Lo leh leilet-a loneitute inhmantawm theih tur heng bungrua vailiamna hunah hian Agriculture Minister chuan COVID hripui leng karah Sawrkar leh Department chuan loneitute kawng hrang hranga dawmkan, chawhphur leh fuih tumin hma an lak mek thu a sawi a, chung zinga pawimawh tak chu an thlawhhma leh leilet-te awlsam tak leh awmze nei zawka khawl hmanga an buatsaih leh an enkawl theih nana khawl hrang hrangte ngaihtuahsak a nih a nih leh chumi kawnga bultanna pawimawh tak chu he hun an buatsaih hi a ni tih a sawi a ni.

Minister chuan khawl tam zawk chu zau-ah loneituten an inhman-tawm tur angin ruahman a ni tih sawiin, Custom Hiring Centre a khawl te chu a nihna ang taka an tharchhuah tihpun kawnga hmang tangkai turin a chah a. Sawrkar in heng khawl man te hi za zelah 95 a tum avangin an hman tangkai loh leh an hluihlawn mai chuan a la let thei tih sawiin, khawl te chu Sal anga chhawra, fa tlum anga duat turin a fuih a. Zau hrang hrang a thlawhhma neite chu intelkhawm a awmze nei zawka khawl hmanga hlawk zawka lo neih, Organised Farming anga kal a pawimawh thu a sawi bawk.

Tun tuma khawl hrang hrang vailiam hi Central Sawrkarin (90:10) a Sub-Mission on Agricultural Mechanization (SMAM) hnuai a ruahman niin a bultanna a ni a. He Scheme atan hian kum 2020-21 chhungin nuai 954.89 dawn a ni a. He sum hmang hian Department chuan loneituten an Lo, huan leh leilet-a an hman tur khawl chi hrang hrang an leina turin SMAM hnuaia subsidy pek theih ang zelin pekchhuah a tum a. Chungte chu - Custom Hiring Centre hrang hrang atan Tractor 52 leh a kaihhnawih bungrua te; buh sengna khawl (Paddy Thresher) 40; Leilehna khawl (Power tiller) 150; Mini Power Tiller 100; Hnim samfaina khawl (Brush Cutter) 400; Knapsack Sprayer 100; Leilehna khawl vir theih (Rotavator) 20; Fu herna khawl 75 leh Kurtai chhuana bel lian 85 te an ni.

Kum 2013-14 atanga 2021-21 thleng hian Department in loneitute tan subsidy in Power Tiller 1110 leh Mini Power Tiller 354 an pechhuak tawh a. Kum 2013-14 atangin loneituten khawl inhmantawn theihna, Custom Hiring Centre 181 din tawh niin tun tumah hian CHC 52 te tana khawl pekchhuah tum a ni a, hma alo lak tawh nen a vaiin CHC 233 a tling tawh dawn a ni. Heng Custom Hiring Centre-ah te hian khawl man to bik, Tractor te, lei lehna hmarua te leh buhsengkhawl te chu za zelah 95 subsidy in pek thin a ni.

Comments

Chhiar Hlawhte