Raltlan te vang a ni lo tih MPCC in an sawi

Congress Party chuan Mizoram-a CO-VID-19 hluar zelna chhan chu raltlante vang ni lovin, COVID-19 dona kawnga MNF sawrkar a hlawhchham vang a ni tih an sawi.

Nimin a thuchhuah an siamah MPCC Media Department chuan July 13, 2021 khan Prime Minister Narendra Modi hovin Union Minister thenkhat, Official pawimawhte leh North East State Chief Minister pariat ten Video Conferencing hmangin Meeting an neih thu leh State thenkhatin an State chhunga COVID-19 an do hlawhtlin dan report ngaihnawm tak an pek laiin Mizoram Chief Minister Zoramthanga'n Mizoram-a COVID-19 hluar chhan chu raltlan an tam vang ni a a sawi ta mai chu pawi an ti hle tih an sawi a. “COVID-19 do kawnga MNF sawrkar hlawhchham zia thupna atana raltlante mawhphurh tir tumna hi a tha kan ti lo hle a ni,” tiin “India rama Total Lockdown puang rei ber kan ni chunga Mizo-ram-a COVID-19 hluar zelna chhan hi chu raltlante vang ni lovin, COVID-19 dona kawnga MNF sawrkar a hlawhchham vang a ni,” an ti bawk.

MPCC Media Department chuan Myan-mar atangin ram inrelbawlna fel tawk loh avangin kan unaute, Zohnahthlak tam tak sipai hlauin Mizoram-ah an lo raltlan tih sawiin, mipuiin duat taka an lo tuamhlawm mek laia COVID-19 darh nachhan a raltlante CM berin a puh ta mai chu hriatthiam theih ah an ngailo tih an sawi a. “Hnam inpumkhatna kan aupui lai leh, Zofate inzawm-khawmna thu kan kalpui mek laia kan unau raltlante hri thehdarhtu a dik lo taka puh an ni hi a pawi kan ti takzet a ni,” tiin a dikloh zia hria a ngaihdam dil ngei turin Chief Minister chu an phut thu leh COVID-19 dona kawnga MNF sawrkar hlawhchhamna hi pawma hmasawnna kan neih theih nana theihtawp chhuah zawk turin CM chu an ngen bawk.