State pawn lama awmze nei leh uar zawka thudik thehdarh dan tur sawiho a ni

Nimin khan Deputy Chief Minister, Tawnluia hovin Mizoram pawna thudik puanchhuah leh thehdarh chungchang ah kalphung tha zawk tur ngaihthuah a ni a, he hunah hian Information and Public Relations Department changtu Minister, Lalruatkima bakah phai lam chanchinbu leh TV-a thawk Mizo Journalist-te an tel a ni.

Hemi chungchang ngaihtuaha Deputy Chief Minister Pisa-a thutkhawm ah hian Deputy Chief Minister chuan tuna Mizoram leh Assam buaina chungchang a chinchhuaka a sawi hnuah State pawn media hrang hrang ten thil thlen dan dik tak an hriat chian a, an thehdarh theihna tura hmanraw pawimawh ber chu National Media Correspondent te an nih thu a sawi a. “Kan dikna leh thiam kan channa Mizoram chhunga kan hriat ringawt hi a tawk lova, khawvel hriata kan auchhuahpui a ngai,” tiin Deputy Chief Minister chuan, tun ang boruak chauh lo, hun pangngaiah pawh uar lehzuala National News-ah Mizoram hmel a lan tam theih nan tan lak a tul thu a sawi a, chumi atan chuan rawtna te siam turin Journalist te a ngen a ni.

He hunah hian I&PR Minister Lalruatkima chuan Mizoram leh Assam inrina-a buaina thleng mekah media lama inbeihna nasa takin a thleng tih sawiin, National Media a thawk Mizo Journalist te chu “Kan hmachhuan in ni” tiin taima tak leh uar taka Mizoram dinhmun dik tak puangzar turin a fuih a. Amah ngeiin Vairengte leh Saihapui ‘V’ a tlawh thu sawiin, thil thlen dan chipchiar tak Meeting-ah hian a sawi bawk.

Nimin-a thutkhawm ah hian Jounalist-te zawhna chhangin Deputy Chief Minister, Tawnluia chuan ramri chungchang ah sawrkarin ngaihdan nghet tak a nei a, tuna kan dinna ngai atanga tawlh kir a tum lo, a ti a. Ramri buaina chinfel a nih theih nan Sawkar chuan ama kaih-hruaina hnuaiah Boundary Committee a din a, chu chuan chak takin hma a la chhunzawm zel dawn tih sawi bawk.

He thutkhawm ah hian Mizoram pawn media hrang hranga thawk Mizo Journalist te an tel kim hle a, Mizoram Rajya Sabha MP hlui Lalhmingliana pawh a tel a ni.