Mizoram-ah hri kai sang chuang hmuh leh an ni

Niminpiah khan Mizoram-ah Sample 7232 enfiah leh niin heng atang hian COVID-19 hri kai 1100 zet hmuhchhuah leh an ni a, heti hian Mizoram-a hri kai hmuhchhuah pawh 36,397 an tling tawh a ni.

Niminpiah khan ZMC-a RT-PCR Laboratory-ah Sample 1950 enfiah niin heng atang hian hri kai 259 hmuhchhuah an ni a, an zinga 255 te hi Aizawl District-a Sample lak te niin hri kai hmuhchhuah tamna ber Tuikual North-ah hri kai mi 31 hmuh an ni a, Chhinga Veng leh Vaitin-ah 17 ve ve hmuh niin Armed Veng South leh Venghlui-ah 14 ve ve hmuh an ni a, Chanmari West-ah hri kai mi 13 hmuh an ni bawk a, a bak te hi Veng leh khua 47 ami te an ni bawk. Hei bakah hian Serchhip District atanga Sample thawn atangin hri kai mi 4 hmuh an ni a, Thenzawl khua te niin hri kai tawh nen inkawmhnaihna neih avanga inkhunghrang lai an ni.

Niminpiah khan Mizoram District hrang hranga TrueNat Laboratory 10-ah Sample 376 enfiah niin heng atang hian hri kai mi 66 hmuh an ni bawk a, Mamit District-ah hri kai mi 20 hmuh niin an vaiin Dapchhuah khua vek an ni a, Lunglei District-ah hri kai mi 15 hmuh niin Aizawl District-ah 8, Siaha District-ah 7, Lawngtlai leh Serchhip District-ah 2 ve ve leh Kolasib District-ah hri kai pakhat hmuh an ni bawk.

Mizoram hmun hrang hrangah niminpiah khan Rapid Antigen Test hmangin Sample 4906 enfiah ni bawkin heng atang hian hri kai mi 786 hmuh leh an ni bawk a, an zinga mi 556 te chu Aizawl District-a hri kai hmuhchhuah an ni a, Zuangtui-a Sample enfiah runpui-ah hri kai mi 100 zet hmuhchhuah niin Phunchawng-ah 35, Lawipu-ah 33, Dawrpui Vengthar-ah 29, Sairang-ah 24, Khatla East-ah 22, Bawngkawn-ah 21 te chu Veng leh khaw mal-a hri kai mi 20 chuang hmuhchhuahna an ni a, a bak zawng hi Veng leh khaw dang 60 ami te an ni thung.

Kolasib District-ah hri kai mi 78 hmuh ni bawkin Lunglei District-ah hri kai mi 53 hmuh an ni a, Champhai District-ah 32, Siaha District-ah 28, Lawngtlai District-ah 22, Mamit District-ah 10 leh Serchhip District-ah hri kai mi 7 hmuh an ni bawk.

Heti hian nimin thlenga Mizoram-a COVID-19 hri kai hmuh tawh chu 36,397 niin nimin a hri kai enkawl dam belh mi 246 te nen nimin tlai dar 5:00 thleng khan hri kai 24,903 te chu enkawl dam an ni tawh a, hei hi hri kai hmuhchhuah atanga chhutin za zela 68.42 a ni a, tunah hian hri kai enkawllai 11,354 an la awm mek a, Hri kai zingah boral awm belh lovin mi 140 an boral tawh a, niminpiah leh nizan-a he thu buatsaih lai thleng hian hri kai zingah boral an awm lo tawh a ni.

Mizoram-a District hrang hrang zingah hri kai enkawllai neilo an awmlo mek a, nimin thlengin Khawzawl leh Hnahthial District tihloh ah chuan hri kai boral an awm vek tawh bawk a ni.