Latest News

RAgT a rintlak ah ngai

Mizoram sawrkarin COVID-19 positive hmuhchhuahna atana a hman Rapid Antigen Test (RAgT) chu a rintlak ah ngaiin hman chhunzawm zel tum a ni.

IDSP State Nodal Officer Dr. Pachuau Lalmalsawma chuan Rapid Antigen Test (RAgT)-a positive hmuh/man chu a dik nia sawiin, “Rapid Antigen Test (RAgT) hian positive hi zaa za deuh thawh a hmu dik a, negative ah chuan hmaih palh chu a awm thei a. Hei hi a chhan chu natna insiam lai (incubation period) laiin hmuh loh (negative) a awm thei a, hetiang hi chu eng khawl-ah pawh a awm thei a ni,” a ti a. Mi thenkhat ten Hritlang Khawsik leh natna dang te chu RAgT hian positive angin a hmu nia an sawi chungchang ah an test na chu a rintlak tih sawiin, “Tun hma lama kan hman thin Antibody ah kha chuan natna a man/hmu kawp thei a, mahse Antigen erawh hi chu a bik (specific) anih avangin a rintlak a ni,” a ti.

Dr. Pachuau Lalmalsawma chuan RAgT chu tunhnaia TNT leh TBCC an test-na ah pawh a rintlak nia an hriat thu sawiin, “Thutak Nunpuitu Team leh Tawngtai Bethel Camping Centre-a kan test-na ah hmanraw thuhmun mai bakah thawktute pawh a thuhmun an ni a, heng ah te hian False positive an awm lo niin kan hria,” a ti a. COVID-19 chu RP-PCR a test vek tur chuan a buaithlak dawn nia sawiin, “RT-PCR ah chuan Microbiologist ten an test a ngai a, hetiang tur chuan hmun hla zawk Siaha leh a dang te tan a buaithlak a. Mahse RAgT-ah chuan Laboratory Technician ten an test thei vek a, mal-sawmna a ni zawk a ni,” a ti bawk.

Tunlai hri kai tlem theihloh chhan chu hri a kal laklawh nia a hriat thu sawiin Dr. Pachuau Lalmalsawma chuan, “Tuna hri leng mek hi nikum lama mi Wuhan Strain kha ni lovin Delta Strain a ni a. Hei aia inkaichhawn awl zawk Delta Plus Strain pawh a awm tawh em aw kan ti,” a ti bawk.

Comments

Chhiar Hlawhte