Latest News

COVID-19 hri pui inkaichhawnna chhu chat turin theihtawp chhuah a ngai - Health Minister

Health Minister Dr. R. Lalthangliana chuan COVID-19 hri pui inkaichhawnna chhu chat turin theihtawp chhuah a ngai tih sawiin, “Hei hi lockdown kan kalpui chhan ber pawh a ni,” a ti.

Nimin khan SAD Conference Hall-ah July ni 24, 2021 thlenga AMC huamchhunga Total Lockdown leh Mizoram chhung hmun danga inkhuahkhirhna kalpui chhunga chetlak dan tur sawihona neiin he hunah hian Health Minister, Dr. R. Lalthangliana chuan Total Lockdown puan chhung hian Aizawl khawpui leh Mizoram hmun hrang hrangah COVID-19 hri pui inkaichhawnna chhu chat turin theihtawp kan chhuah a ngai a, hei hi lockdown kan kalpui chhan ber pawh a ni, a ti a. “Hetih hun chhung hian Aizawl khawpui huamchhunga hri kai tamna leh pun chakna Veng-ah te sample test runpui (mass testing) neih tum a ni a, TNT, Muanna Veng, Aizawl-a thla kalta lama Mass Testing kan neih khan awmzia a nei tha hle a, khami tuma kan kalpui ang khan hma kan la dawn a ni,” a ti.

He hunah hian Sample Test runpui nei tura sawrkar inruahman dan tarlan a ni a. Sample Collecting Team (Sample lak saktute) indaihlohna phuhru turin Volunteers Sample la tur Laboratory Technician leh Report buatsaihtu tur Data Entry Operator (DEO) mi 50 vel Sawrkar leh Aizawl City Local Council Association tangkawpin an lakfel tawh thu leh training pawh pek tawh thu tarlan a ni a, indaihlohna a la awm chuan a tul angin sawrkar hnathawkte chhawr an nih dawn thu tarlan a ni bawk. COVID-19 hri kai tamna Veng leh pun chakna Veng-ah te Mass Testing hi rang taka neih a, a thawhkhatna a Negative te chu ni 4 hnuah Test nawn leh tur a ni a, a tul dan anga zirin Serial Testing hi vawi engemawzat tih tum a ni. Sample Test-na atana hman tur Rapid Antigen Test Kit chu mamawh ang zat a awm thu leh Test Kit indaihloh hlauhthawnawm a nih loh thu tarlan a ni a, Aizawl pawnah pawh a tul dana zirin District thuneituten ruahmanna an siam tur thu sawi a ni bawk.

Tunhnaia Aizawl Veng thenkhata Mass Testing neih tura ruahmanna siamah Veng chhung hruaitute atangin remti lo an awm thin tih tarlan niin, tun tuma sawrkarin hetianga hma a lak lehna turah hi chuan sawrkar ruahmanna tha taka lo thlawp turin khawtlang hotute ngen an ni a. CCC leh CCCC indaihlohna avanga hlauhthawnna awm thei nia lang pawh sawrkarin theihtawp chhuaha hma a lak thu leh engmah hlauhthawnna tur a awm loh thu tarlan a ni.

He huna tel MLA pathum- Vanlalhlana, C. Lalmuanpuia leh C. Lalsawivunga te chuan sawrkarin Mass Testing a kalpui tur chu tha an tih thu leh CCCC Mizoramin kan nei chu ramdanga an tih ve theih loh, kan thawhho tlanna a thatzia tilangtu a nih thu te an sawi bawk.

Comments

Chhiar Hlawhte