Dan lova lirthei chuanman tisang hrem an ni dawn

Mizoram State Transport Authority (STA) chuan hripui leng vanga State in harsatna a tawh mek laia dan lova motor chuanman tisangte chu hrem an ni ang, a ti.

Hemi chungchanga hriattirna an tihchhuah ah STA chuan Mizoram chhunga lirthei chi hrang hrang chuanman te chu STA-in a siam thin a, thuneitu ni lo, mahni duhthu-a chuanman lo tisang ve ngawt an awm thin thu leh hei hi dan kalh a nih thu an tarlang a. Hripui leng mek vanga mi tam takin nitin khawsak kawngah harsatna an tawh mek laia dan lova motor chuanman lo tihsan tum an awm thin chu STA in a ngai thu tak hle tih sawiin, hetianga STA thuchhuak lova motor chuanman lo tisang hriat an nih chuan MV Acts & Rules hnuaiah hremna pek theih a ni tih an tarlang a. Sawrkar rate siam zawm lova mahni thu-a rate tisang an awm a nih chuan Transport Department hotute hnenah report turin mipui an ngen a, a tul angin hremna pek an ni dawn tih an thuchhuah ah hian an tarlang bawk.

STA chuan, Taxi te chu Contract Carriage an ni a, hire tura duan an ni tih sawiin, hetihlai hian Bus/Maxi Cab te chu Stage Carriage niin, passenger ten KM rate in chuanman an pe thin tih sawiin, hetiang a nih laia Taxi-te inthawh tawma hmang (Contribution System) thin an awm thu leh, chu chu dan phalloh a ni tih an hriattirna tihchhuahah chuan an tarlang bawk.