Ramri-a Duty te MLA in tlawh

Hachhek bialtu MLA, Lalrindika Ralte chuan nimin leh niminpiah khan Mamit District chhung Chuhvel ram-a tunhnaia Assam lamin chet an rawn thawhna hmun te chu a tlawh.

Hachhek bialtu MLA hian Chuhvel ram-a Police Duty te tlawhin hrehawm mahse kan tihtur, kan mawhphurhna hlen tura penchhuak theuh kan nih avangin, vui leh vaina atana hmang lo turin a chah a. Kan tanrualna leh inpekna avang chauhin he kan ram hi kan humhim thei a ni tih sawiin, “Assam nena kan ramri hi engtia rei nge kan la buai dawn a hriat loh a, chuvangin ramri vengtu Police-te mamawh zualpui dapchawp ngai lova neih sa thlap hi a hun tawh, hripui a len avangin ramri dep-a awmten ni tam tak an eizawnna kalsana hnatlanga buk sak a ngai zel hi pumpelh dan kawng zawn a hun tawh,” a ti bawk.

Mizoram Police-te chuan tuna an buk sakna chin atang chuan Mizoram lam chu eng ang pawha an ven zawh theih an rin thu an sawi tih helai hmun tlawhtute chuan sawiin, Assam lam hian tun thla ni 14 zing-a Mizoram vengtu, Mizoram Police awmna bul an rawn kal bak thawm an la rawn nei zui lo niin an sawi bawk a. Amaherawh chu Assam lam hi BOP (Gurguthi Border Outpost) lamah mamawh te chhekin an awm ve mek nia sawi a ni bawk.

Mizoram Police te Base Camp hi Chuhvel atanga KM 4 vela hla niin lirthei tlanluh theihna tura siam ni tawh mah se ruahtui a tlak tawh avangin lirthei hi an kal hlei thei tawhlo nia thudawn a ni a. Kawng sial tura rawih JCB pahnih pawh tangin nimin khan lakchhuah theih an beisei tih kan thudawnna chuan sawiin, Tui leh Eng pawh an nei mumallo nia thudawn a ni bawk. Chuhvel ram-a Mizoram Police te Duty-na hmun tur hi tunkar Thawhlehni atang khan hnatlang a sak niin nimin pawh khan mi 70 vel an thawk leh nia thudawn a ni bawk.