Latest News

PC Party Sr. Vice President in mipuite sawm

Peoples' Conference (PC) Party Senior Vice President, Vanlalruata chuan 'Kan ram, kan hnam, kan sakhaw' himna atana hma la ngam sawrkar siam ngei tura inbuatsaih turin Zoram mipuite a sawm.

Nimin a thuchhuah a siamah PC Party Sr. Vice President chuan Assam, Manipur leh Tripura te nen ramri kan neih felloh rualin Assam in kan ram zau tak a la enkawl avangin anni nen hian kan ramri hi a fello zual tih sawiin, “Hemi chingfel tura remchanna neia sawrkarna fawng chelh reng si, hma la ngam si lo Political Party kan neih te hi Museum a dah tawh a hun a ni,” a ti.

Vanlalruata chuan British in India an awp hnu khan Inner Line siam niin chu chu kan ramri a ni tih pawh sawiin, “British ho duhamin ramri rawn pelin kan ram-ah kawngpui siam an tum a. Chumi avanga buaina kal zelah kan ram pumpui min laksakin an thuhnuaiah min dah a. Hun kal zelah British sawrkar te, British India sawrkar leh Assam sawrkar pawhin kan ram ngeia a pawm, Inner Line Reserved Forest zau tak chu Assam in a enkawl ta zel a. Hei hi kan ram a nih avangin laklet ngei hi Mizo ten kan tihtur leh mawhphurhna, min thlahtute laka kan bat a ni,” a ti.

PC Party Sr. Vice President chuan kan ram pawh chhan ngam lo Political Party te thuneihna pek zui tawh loh hi kan tih turah an Party chuan an ngai tih sawiin, “Assam in kan ram a enkawl zawng zawng laklet hi keini Party chuan kan ngam a, a tihdan tur pawh hre ngeiah kan inngai a ni,” a ti bawk.

Comments

Chhiar Hlawhte