Latest News

COVID-19 hri danna la thei chin zawng ten hri danna la vek turin Serchhip CMO in a sawm

Image
Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

Mizoram Governor 22-na atan Dr. Kambhampati Hari Babu lakluh a ni ta

Mizoram Governor tura ruat, Dr. Kambhampati Hari Babu chu nimin khan Raj Bhavan-ah rinawmna thu tiam tirin Mizoram Governor 22-na atan lakluh a ni ta a. Hri leng avanga inkharkhipna kalpui a nih leh mek avangin he hunah hian sawm bik mi tlemte chauh an tel a ni.


Mizoram Governor thar lakluhna inkhawm hi nimin tlai dar 4:30 khan Raj Bhavan Durbar Hall-ah neih a ni a, Gauhati High Court-a Chief Justice aiawhin Justice Michael Zothankhuma, Judge, Gauhati High Court chuan rinawmna thu tiam tirin Dr. Kambhampati Haribabu chu Mizoram Governor atan a lalut a ni. Governor thar lakluhna inkhawm ah hian India President in Mizoram Governor atana Dr. Kambhampati Hari Babu a ruatna chu Chief Secretary, Lalnunmawia Chuaungo chuan a chhiar chhuak a, hemi hnu hian Governor thar hi lakluh a ni. Governor lakluhna Inkhawm ah hian sawm bik mi tlemte telin Chief Minister Zoramthanga, Deputy Chief Minister Tawnluia, Speaker Lalrinliana Sailo, Council of Minister te, Chief Secretary, DGP, Political Party aiawh hruaitu pakhat theuh, NGO lian deuh te aiawh hruaite pakhat zel te chiah an tel a ni.

Mizoram Governor 22-na tura ruat Dr. Kambhampati Haribabu hian nimin khan Mizoram rawn thlengin Lengpui Airport-ah Chief Minister Zoramthanga, Health Minister Dr. R.Lalthangliana, Chief Secretary Lalnunmawia Chuaungo, Mizoram Director General of Police (DGP) SBK. Singh, Secretary to Governor V. Lalsangliana, 23 Sector Assam Rifles-a Sector Commander Brig. Digvijay Singh SM leh Official pawimawh dang ten an lo dawngsawng a. Hemi hnu hian Motor hmanga Raj Bhavan pan nghalin Raj Bhavan-ah hian Deputy Chief Minister Tawnluia, Home Minister Lalchamliana leh Governor's Secretariat ten an lo hmuak bawk a ni.

Mizoram Governor thar Kambhampati Hari Babu hi June 15, 1953 khan Thimmasa-mudram, Prakasam District, Andhra Pradesh-ah a piang a, a pa hi Kambhampati Venkateswarlu niin a nu hi Seethamma a ni a, a nupui Kambham-pati Jayasree nen fanu pahnih an nei a ni.

An khua a Sikul te a luh hnuah zirna sang zawk zir turin Visakhapatnam-ah a insawn a. Andhra University-ah B.Tech (Electronics and Communication Engineering), ME (Electrical & Control Systems) leh Ph.D (Control Systems) te zirchhuakin zirtirtu-ah a tang chhunzawm a. Associate Professor a nih hnuah pawh kum 24 lai chu he University chhunga Engineering College-ah a thawk hman a; he hna a thawh lai hian mipui rawngbawlna huang zau zawkah luh duhna neiin politics-ah a in hmang chho ta a ni.

Politics huanga a luh hnu hian a hlawhtling chho hle a, Visakhapatnam-I bialtu MLA a nih lain kum 2003 khan Assembly House-ah Floor Leader te a ni thin a. Hemi hnuah kum 2014 khan Andra Pradesh State BJP President atan thlan a ni leh a; kum 2014 khan 16th Lok Sabha chhunga Vishakapatnam khawpui bialtu Member of Parliament (MP) atan thlantlin a ni leh bawk. Mizoram Governor atan ruat a nih hma hian India ram pum huapa dinhmun pawimawh tak, BJP National Executive Member (2018-2021) a ni thin a ni.

Comments

Chhiar Hlawhte