Sawrkar laipui-ah kawng danpin thlen a ni

Mizoram sawrkar-a Home Secretary chuan Union Home Secretary hnenah lehkha thawnin Mizoram ei leh bar lakluhna kawngpui Assam in an danpin chungchang a thlen.

Tunhnaia Assam leh Mizoram ramri-a buaina chhuak kal zel chungchanga Union Home Secretary hnena nimin-a lehkha a thawn ah hian Home Secretary Lalbiaksangi chuan NH-306 leh Mizoram leh Assam inkar kawng te chu Assam chuan July 26 atanga nimin thlengin a dang ping tih a sawi a. NH-306 hi Mizoram mipuite nitin mamawh lakluhna kawngpui pawimawh ber a nih avangin hei hian nasa takin Mizoram State chhung mipuite tan nitin khawsak phungah harsatna a siamsak tih a sawi a. Hei mai bakah hian Assam atanga Mizoram luhka zawng zawng te chu Assam hian a dan thu leh Assam State chhunga Hailakandi District-ah misual tu tih hriat loh ten Mohammedpur Railway Station leh Ramnathpur Railway Station-a Rel kawng an tihchhiat thu pawh tarlangin, “He Rel kawng tihchhiat tak hi Mizoram tana kawng pawimawh tak niin Bairabi Railway Station pawhna kawng awmchhun a ni a, National Highway tih lohah chuan Mizoram-in mamawh a phurhluh theihna kawng awmchhun a ni,” a ti bawk.

Home Secretary chuan Assam State sawrkar hmalakna in Mizoram chak lakna kawng te hi kum kalta, Oct. 17 atanga Nov. 11 thleng khan danpin a lo nih tawh thu pawh a lehkha ah hian ziakin, Sawrkar Laipui chuan he thil pawi tak thleng mek hi a ngaihthah thiang lo tih a tarlang a. An pawikhawih mek titawp turin Assam Sawrkar hnenah khauh taka thu pe turin a ngen a ni.