Latest News

Sub-Hqrs. YMA in Darnam Veng-ah thilpek hlanin NH. 54 kawng laihzauh mek an tlawh

Serchhip Sub-Hqrs. YMA chuan hri leng avanga harsatna tawk mek Serchhip Darnam Branch YMA te hnenah nimin khan mipui mamawh buhfai leh chawhmeh hlanin nimin vek khan Serchhip leh Keitum inkar-a National Highway-54 kawngpui laihzauh hna thawh mek chu an en nghal bawk.


Serchhip Sub-Hqrs. YMA te hian Serchhip District-a Veng leh khaw mal-a COVID-19 hri kai tamna ber ni mek Serchhip Darnam Veng-ah hian Branch YMA kaltlangin buhfai bag 5, Tel pack 30 leh Dal kg. 30 hlanin heng te hi Rs. 12,355/- hu a ni a, heng thilpek hlanna puala inkhawm tawi Darnam Branch YMA Hall-a neih ah Serchhip Sub-Hqrs. YMA President, Kawlthuama chuan COVID-19 hri kai darh thinna chhan ber chu fimkhur loh vang leh VLTF leh Executive Duty te thu kan awih loh vang a ni a ni tih sawiin, mipui te chu hri laka kan him tlan theihna turin sawrkar thupek leh thuchhuah te zawma VLTF leh Executive Duty te thu ngai pawimawh turin a chah bawk a ni.

He hunah hian Darnam Branch YMA President, Khualluna chuan lawmthu sawiin, an Veng dinhmun te a tarlang a. Serchhip Darnam Veng-ah hian June 21 khan COVID-19 hri kai hmuhchhuah an awm tan a, nimin thleng khan hri kai mi 21 lai hmuhchhuah an awm tawh a, tunah hian In lama khunghran chhungkaw 47 an la awm mek bawk a ni.

Nimin-a Darnam Branch YMA te hnena thilpek hlanna neih a nih hnu hian Serchhip Sub-Hqrs. YMA hruaitute hian Vigilance & Monitoring Committee hruaitute nen Serchhip leh Keitum inkara NH. 54 laihzauh hna thawh mek chu an tlawh nghal a. He kawng laih hna hi NHIDCL hnuaiah Kram Infracon Pvt. Ltd. chuan thawk mekin he hna hi tunhnaiah thawh tan chauh a ni a, kawng laihna leivung te chu paihfai nghal vek theih a nih thin loh avang leh tunhnaiah ruahtui a tlak tak bawk si avangin lirthei a kal thin leh zin veivak bakah bungraw phur lirthei ten harsatna an tawk chho mek a. Hei vang hian YMA hruaitute chuan kawng laih hna thawktute chu leivung te a theih anga thianfai nghal zel tura an ngen bakah mipui harsatna te chu a tul angin thuneitu sang zawkah thlen an tum thu an sawi a. Helai hmuna kal thin lirthei khalhtu thenkhat te chuan kawng laih hna hi Fur ruahtui tlak lai chuan chawlhsan rih mai se tha an tih thu te pawh an lo sawi tawh bawk a ni.

Comments

Popular News (Last 30 Days)