Latest News

ZMC-a Dedicated Covid Hospital a khat hneh

COVID-19 hri leng avanga hmalakna hrang hrang ngaihtuahin nimin khan Health Minister hovin sawrkar mi pawimawh te chu SAD Conference Hall-ah an thukhawm a. He hunah hian COVID-19 hri kai an pun belh zel avangin Dedicated COVID Hospital (DCH), SRHF-ZMC chu a khat hneh hle tih tarlan a ni.

He thutkhawm ah hian Health Minister Dr. R. Lalthangliana chuan COVID-19 hripui dona a ral hmatawnga thawktute chu an hah rimtawng tawh hle a ni tih sawiin, ram leh hnam himna tur anih vangin theihtawp chhuaha tangmar hram hram turin a ngen a ni.

COVID-19 hri kai an pun belh zel avangin Dedicated COVID Hospital (DCH), SRHF-ZMC chu a khat hneh hle tih he hunah hian tarlan niin tun dinhmunah COVID Ward 7, khum 237 awmna leh ICU khum 34 awmin, July ni 1 - 12 inkar khan chawhrualin COVID Ward-ah nitin damlo mi 262 an awm thu leh nimin khan damlo 302 an awm thu tarlan a ni a. ZMC tih thawlna tura DCHC, MRB Head Office, MINECO, khum 50 awmna chu a khat reng tawh a, damlo serious lote chu CCC leh CCCC-ah te sawn chhuah thin an ni. DCHC siam belh tura ruahmanna siam niin Kulikawn Hospital chu tuna damlo enkawl lai mekte Civil Hospital lamah sawnin, COVID-19 hri kai enkawl uluk ngai bikte awmna tura ruahman a ni bawk.

Thawktu indaihlohna a nasat thu pawh he hunah hian tarlan niin ZMC-a volunteer thawk MCON-a B.Sc (Nursing) Final Year leh Health & Wellness Officer mi 40 vel chu an exam a hun tawh avangin an chawlh a ngai a, hei bakah hian COVID Ward khum 30 awmna hman mai theih tura peihfel tawh pawh thawktu lak belh an nih loh chuan tihpuitlin a harsat dawn thu an sawi a, Specialist Doctor, ICU-a duty tur, Critical Care ti thei an neih belh loh chuan a manganthlak tan tih sawi niin, a rawihna tur pawh awm se Specialist Doctor COVID-19 hri kaite enkawlna tura thiamna bik nei Mizoram-ah an vang tawh tih tarlan a ni bawk.

WHO hotuten khawvel hmun 6-a an then a hmun 5 ah COVID-19 hri kai an pung leh tawh tih an sawi thu he hunah hian tarlan a ni a, Mizoram-ah pawh COVID-19 hri kaite zingah naupang lam an pun chak avangin Third Wave lo thleng tur an sawi atana inpuahchahna pawh a chak thei ang bera kalpuia tul tih sawi a ni bawk. Tun dinhmunah COVID-19 hri kaite zingah symptom nei, Oxygen pek ngai an pun chak thu pawh he hunah hian tarlan a ni a, a tira symptom nei lo, a hnua symptom na taka nei an tam thu tarlan niin District tina COVID-19 hri kai, Oxygen mamawh leh enkawl uluk ngai bikte dahna tura ruahman Dedicated COVID Health Centre (DCHC) te chu sawrkar laipui inkaihhruaina anga a nih dan tur taka hmang tura in hriattir leh nise tih a ni bawk.

Comments

Chhiar Hlawhte