Serchhip District chhung khaw 25-a Buh te natna in a beih avangin hmalak mek a ni

Serchhip District chhung khaw 25-a Thingtlang Lo-a Buh chin te chu kumin hian Buh natna chi khat, Rice Blast chuan a bei mek a, Agriculture Department chuan a theih anga hma lain damdawi nen tan an la mek.

Serchhip District Agriculture Officer, Tlangtimawia Zote chuan nimin khan LENKAWL zawhna chhangin Serchhip District chhung khaw hrang hrangah Buh natna chi khat, Rice Blast chungchang hi report an dawn thu a sawi a. Serchhip DAO chuan heng Buh natna tuar hi khaw 25 atanga an dawn thu sawiin, Buh hnah te chu Tuiek rawng anga lo awmin a nasat chuan Buh kung a thi mai thin tih a sawi a. Hetiang Buh natna hi thil thar a nih loh thu leh, Mizoram-ah a lo awm tawh thin thu te, eng vak-a ngaih thin a nih loh thu te a sawi a, amaherawh chu kumin hian ruahtui tlak dan in a zir loh avanga sik leh da anglam ah kumdang aia a nasat thu sawiin, an Department chuan a tul anga enfiah tura thawktute insemdarhin tunah hian Report lakkhawm mek a ni tih a sawi a. Buh natna tuar mek te hi Thingtlang Lo a nih thu leh Leilet lamah erawh chuan Buh an la phun chauh avangin a dinhmun tur hriat ala nih loh thu pawh sawiin, an Department hotute hnenah harsatna thleng hi thlenin nimin khan damdawi thahnem tak Aizawl atanga a rawn thlen leh tawh thu leh a theih anga hmalak chhoh zel a nih dawn thu a sawi bawk.

Serchhip DAO Office-a ADAO, R. Lalrinawma chuan Rice Blast chu Fungus chi khat, Pyricularia Oryzae vanga lo awm a ni tih sawiin, boruak lum leh hnawng-a natna inthlahpung thei a ni tih a sawi a. Buh hnah eng atangin a langchhuak tih sawiin, khaw hrang hrang an fankualna atangin tun dinhmun ah chuan a Stage hniam ber, Leaf Blast an tih ah an la awm hlawm tih a sawi a, hei hi buh chi a tiah atanga chang a neih hma hun chhung niin, Department in hma an lak nghal avangin he Stage bak hi chu pel rihlo turah an ngai tih a sawi. Amaherawh chu Node Blast leh Neck Blast Stage ala awm thu sawiin, hei hi Buh kung in Chang a neih hnu leh Buh a rai dawna awm tur a nih avangin Buh thar a nghawng dan tur pawh hriat theih ala nih loh thu leh harsatna lian zawk a thlen lohna turin theihtawp chhuaha hma an lak tur thu a sawi a. He Buh natna hi tuna tihreh a nih loh chuan Buh thar ang ang te pawh a chi-a hmang leh tur chuan sawngbawl hmasak a tul dawn avangin theihtawp an chhuah thu sawiin, tun dinhmun ah chuan Idaw (buhban) ten an tuar nia a lan thu a sawi bawk.

Agriculture Department hotute chuan hetiang natna tuar nia rinhlelh nei te chuan Department-a thawk te hnenah hriattir zel turin an chah bawk a ni.