Serchhip Blood Bank-ah thisen indaihlohna a nasa

Serchhip damdawi In-a Blood Bank-ah thisen indaihlohna a thleng mek a, thla hmasa atang khan thisen dahkhawl sa pawh a awm hman meuhlo tih thawktute chuan an sawi.

Serchhip Blood Bank-a thawktute chuan thla hmasa, June 2021 chhung khan Serchhip Blood Bank hian tum 4 Blood Donation Camp an buatsaih tih sawiin, June thla chhung khan thisen Unit 107 an dawng tih an sawi a, heng zinga Unit 101 te chu Voluntary Blood Donation, a thlawna pek niin a bak Unit 6 te chu mi tu te emaw tan bika pek (Replacement Donation) a ni thung tih an sawi a. June thla chhung khan Serchhip Blood Bank atang hian thisen Unit 106 pekchhuah a nih thu an sawi bawk.

Serchhip Blood Bank hian thla khat ah thisen Unit 60-70 bawr vel a mamawh thin anga chhut a ni tih Association for Voluntary Blood Donation (AVBD) Serchhip Branch hruaitute chuan sawiin, hemi atan hian thla khat ah tum 2 vel Donation Camp pawh buatsaih thin a ni tih an sawi a. Amaherawh chu June thla khan tum 4 lai Donation Camp buatsaih a nih thu leh thisen pawh mi tlawmngai ten za chuang an pek laia thisen indaihlohna nasa tak awm ta chuan mipuite tan harsatna a thlen mek tih an sawi a, tunah hian pawl leh mimal tlawmngai te chu thisen pe tura sawmin, thisen pe thei turte chuan AVBD Ser-chhip Branch hruaitute hnenah emaw, Blood Bank-a thawktute hnenah emaw in hriattir turin an ngen bawk a ni.

Hetianga Serchhip Blood Bank-a thisen indaihlohna nasa tak a awm mek avang hian Ser-chhip-a Mizo Chelsea Supporters Club member mi 4 te chuan Blood Bank-a thawktute sawmna angin Serchhip Blood Bank-ah hian thisen an pe a, hei bakah hian nimin vek khan mi tlawmngai thenkhat te chuan damlo mamawh te hman nghal turin thisen an pe bawk a, heng tlawmngai a thisen petute chungah hian AVBD hruaitute chuan lawmthu an sawi a ni.