Serchhip District-a a thlawna Zirlaibu sem tur Serchhip atangin pekchhuah a ni ta

Kumin a Elementary School-a Zirlaite hnena sawrkar in a thlawna Zirlaibu a sem turte chu nimin khan Serchhip District-ah semchhuah tan a ni.

Kumin a Primary School leh Middle School Zirlaite hnena sawrkar in a thlawna Zirlaibu a sem turte hi Serchhip District-ah chuan Samagra Shiksha, Serchhip District Office atangin semchhuah a ni a, kumin hian Primary School Zirlai naupangte hnenah Rs. 250/- man sem tur niin Middle School Zirlai naupangte hnenah Rs. 400/- man semchhuah tur a ni bawk a, heng te hi kar hmasa lam khan Serchhip District rawn thlenpui ni tawhin tihtur tul ang ang te tihfel a nih hnuah nimin khan Serchhip Town chhung leh khaw hnaivai te pekchhuah an ni a, tunkar chhung zawng hian pekchhuah chhunzawm tura ruahman niin tunkar hian pekchhuah fel hman beisei a ni a, Zirna In tin-a hotu ten Zirlaibu hi lain hei hi an zirlai naupangte hnenah an sem ve leh dawn a ni.

Samagra Shiksha, Serchhip District-a thawktute chuan kumin hian Sawrkar School leh Govt. Aided School-a zirlai naupangte hnenah Zirlaibu hi semchhuah a ni dawn tih sawiin, Primary School 66-a zirlai naupang 2027 leh Middle School 61-a zirlai naupang 3007 te hnenah zirlaibu hi semchhuah a ni dawn tih an sawi a. Serchhip District chhunga zirna In thenkhat, mimal leh Pawl/Kohhran ten an enkawl zingah Middle School chauh Adhoc Aided te an awm thu pawh sawiin, Serchhip District-ah hian hetiang sawrkar School ni lo, zirlaibu dawng tur hi zirna In 7 an awm thu an sawi bawk.

Kumin hian Pawl 1 leh 2 zirlai naupangt e hnenah Zirlaibu 4 ve ve sem an ni dawn a, pawl 3, 4 leh 5 te hnenah Zirlaibu 7 theuh semin pawl 6, 7 leh 8 te hnenah zirlaibu 6 theuh sem an ni dawn bawk a. Zirlaibu te hi a hranpa a sem-chhuahna hun buatsaih lovin zirna In-a hotu ten nimin atang khan an lachhuak a ni.