Latest News

Ni khat-a hri kai hmuhchhuah la tlahniam theilo

Mizoram-ah ni khat-a COVID-19 hri kai hmuhchhuah zat chu ala tlahniam thei tak tak lova, niminpiah khan Sample 3549 enfiah leh niin hri kai mi 301 hmuhchhuah leh an ni a, Sample enfiah atanga za zela 8.48 te chuan hri an kai a ni.

Niminpiah khan ZMC Laboratory-ah Sample 1009 enfiah niin Aizawl District-a Sample lak bakah Serchhip District atanga Sample lak 46 te a ni a, heng atang hian COVID-19 hri kai mi 47 hmuhchhuah an ni a, an vai hian Aizawl District-a Sample lak vek niin Veng khat atanga hri kai hmuhchhuah tam lutuk awm lovin Armed Veng South, Bethlehem Vengthlang leh Phunchawng atangin mi 6 theuh hmuh an ni a, Venghlui atangin mi 5 hmuh an ni bawk. Heng hri kai hmuh te hi hri kai tawh nen inkawmhnaihna nei deuh vek niin hri kaina hriatloh mi 2 an awm bawk a ni.

Niminpiah khan Mizoram District hrang hranga TreuNat Laboratory 5-ah Sample 207 enfiah ni bawkin heng atang hian hri kai mi 19 hmuh an ni a, an zinga mi 17 te chu Lunglei District ami niin an zinga 15 te chu Lunglei khawpui chhung ami an ni a, midang pahnih te hi tunhnaia State pawn atanga rawn lut an ni. Hri kai dang pahnih te hi Lawngtlai District ami niin tunhnaia State pawn atanga rawn lut an ni bawk.

Mizoram hmun hrang hrangah niminpiah khan Rapid Antigen Test hmangin Sample 2333 enfiah ni bawkin heng atang hian hri kai mi 235 zet hmuhchhuah an ni a, an zinga 158 te hi Aizawl District-a hri kai hmuhchhuah niin Bethlehem Vengthlang-ah mi 19, Bawngkawn leh Ramhlun South-ah mi 14 ve ve, College Veng-ah mi 11, Ramthar Veng-ah mi 10 te chu Veng khat-a hri kai hmuhchhuah tamna niin Central Jail-a tang zingah hri kai mi 7 hmuh leh an ni bawk. Heng bakah hian Mamit District-ah hri kai mi 31 hmuhchhuah niin Lunglei District-ah 24, Kolasib District-ah 9, Lawngtlai District-ah 5 leh Siaha leh Champhai District-ah 4 ve ve hmuhchhuah an ni.

Heti hian nimin thleng khan Mizoram-a COVID-19 hri kai hmuh tawh chu 22,155 niin nimin khan mi 260 te chu enkawl dam an ni ve leh a, heti hian nimin thlenga Mizoram-a hri kai enkawl dam chu 18,643 niin hei hi hri kai hmuhchhuah atangin za zela 84.14 a ni a, tunah hian hri kai enkawllai 3412 an la awm mek a ni.

Mizoram-ah hri kai boral mi 100 an tling ta :

Mizoram-a COVID-19 hri kai zingah mi 100 zet boral an awm ta. Nimin chawhnu dar 1:40 khan Lalsangliana (70), Sihphir chu COVID-19 vangin ZMC-ah a boral ve a, hemi hnu nimin tlai dar 5:50 khan Lalsangzuala (43), Bawngkawn chu COVID-19 vangin ZMC-ah boral ve lehin July 3-a hri kai hmuhchhuah ve ve an ni a. Heti hian Mizoram a hri kai hmuhchhuah chu mi 100 an tling ta a ni.

Comments

Chhiar Hlawhte