Latest News

Ramri-ah Mizoram sawrkar tawlh a tum lo

Kolasib District Bawrhsap, Dr. H. Lalthlangliana chuan, “Mizoram sawrkar chu engti zawng mahin tawlh kan tum lo, kan tawlh ai chuan a nih nih ni turin tan kan la ang,” a ti.

Nimin a Mizoram Police Duty post, Vairengte thleng a Assam Police thahnem tak lo chhoh chungchangah thuthar thehdarhtute kawmin Kolasib District Bawrhsap chuan Mizoram sawrkar chuan kan Duty Post chin chu tha tawpa hauh a tum thu a sawi a. “Kan IR Post, Vairengte khu rawn luahlan a min hnehchhuh an tum chuan silai pawh hman mai tur a ni ang,” tiin hmanraw neih ang anga tan la turin Police te pawh an hrilh tih a sawi a. Assam leh Mizoram Police innawrna karah mipui hliam tuar an awm palh vengthawng tak chungin hmalak a nih thu sawiin, Mizoram Police lam pawh inchah belh zel a nih thu a sawi a. Nimin boruak thleng chungchanga Mizoram Police tawiawma mipui thahnemngaia tak tak thawkchhuakte chungah lawmthu sawiin, thuneitute zai ngai chunga fimkhur tak si pheikhai rual tak leh sawt zawk a thawkho zel turin a chah bawk.

Vairengte IR Post atanga tawlh lo tur hian ruahmanna hrang hrang siam a nih tawh thu leh eng pawh thleng thei a nih avangin inpuahchahna pawh felfai tak a kalpui a nih thu DC chuan a sawi a Ambulance leh Medical Team-te pawh ruat fel tawh a nih thu a tarlang bawk. Hei bakah hian Kolasib DC chuan thu belhchian dawllo thehdarh a nih loh nan leh Mizoram Police-te chetlak tithuanawp thei zawnga Social Media hmang lo tura fimkhur turin mitin te a chah bawk.

Comments

Chhiar Hlawhte